Evaọ Ava 6, 2020, iroiro nọ i bi rou uwou-odi Penal Colony No. 1 evaọ Orenburg nọ ọ rrọ Russia a rọ ekpọ fa inievo isoi mai jọ. Edẹ inievo na họ Aleksey Budenchuk, Gennadiy German, Roman Gridasov, Feliks Makhammadiyev, gbe Aleksey Miretskiy. A kpe rai ga te epanọ Brọda Makhammadiyev o ro wiri ubiofẹ, jẹ nwoma evaọ irue gbe ubieku riẹ, fikiere a tẹ wọe kpobọ ẹsipito. Nọ a rọ ekpọ fa Brọda Budenchuk, German, Gridasov, gbe Miretskiy no, a te gu eware buobu fihọ ai uzou je fi ai họ uwou-odi nọ a rẹ jọ kẹ ahwo uye. Ọrue jọ nọ a gu fihọ ae uzou họ, a je vovo isigareti, kpakiyọ Isẹri Jihova a re tube vovo isigareti dede he.

Wọhọ epanọ ma ta vẹre na, evaọ Azie 19, 2019, obruoziẹ nọ a re se Dmitry Larin o bruoziẹ kpe inievo isoi na avọ oniọvo ọfa nọ a re se Konstantin Bazhenov evaọ okọto nọ a re se Leninsky District Court of Saratov. A ta nọ ejọ e te rria uwou-odi te ikpe ivẹ yọ efa e te jọ uwou-odi te ikpe esa gbe emerae ezeza. Evaọ Akpegbivẹ 20, 2019, okọto nọ a re se Saratov Regional Court nọ a kpare ẹdhọ na kpohọ o rọwo wariẹ guẹdhọ na ha. Evaọ eka jọ nọ i lele i rie, a te fi inievo ezeza na họ uwou-odi. A fi Brọda Bazhenov họ uwou-odi Penal Colony No. 3 evaọ Ulyanovsk Region, fikiere ọ jọ usu inievo nọ a gboja kẹ evaọ uwou-odi Penal Colony No. 1 na ha.

Nọ a nwani mu inievo isoi na te uwou-odi nọ a re se Penal Colony No. 1 evaọ Ava 6, 2020, a te mu ai họ ekpe. A kuvẹ hẹ re edọkita ọ rẹrote ae bọwo okiokiọ riẹ nọ a rọ ruẹ nọ ifiva egaga i kru Brọda Makhammadiyev, yọ ọ jẹ vẹ azẹ. Taure ahwo nọ a wuzou uwou-odi na a te ti se omoto nọ ọ wọ Brọda Makhammadiyev kpobọ ẹsipito, a gba riẹ họ whobọhọ obe nọ a kere fihọ inọ “ẹwhra ọ whra kie evaọ ebafrumu.” Nọ a wọe te obei, a te ru obẹrọ kẹe. A fi oware jọ họ iẹe irue nọ a ro se ekpehre ame nọ o kokohọ irue na no. Nọ a tẹste riẹ, a tẹ ruẹ nọ ọ re te re emu hu evaọ edẹ jọ keme emu nọ a ruẹrẹhọ kẹe nọ ọ rẹ re fikinọ o wo ẹyao nọ a re se celiac disease, ahwo nọ a wuzou uwou-odi na a rọwo siobọno emu na kẹe he.

Oja nọ a bi gbe kẹ inievo mai evaọ obọ Russia na o be kẹ omai uye gaga. Rekọ u mu omai ẹro nọ Jihova ọ te gbẹ kẹ ae ẹgba nọ a ti ro thihakọ je kru ẹrọwọ rai.—Ahwo Filipai 1:27, 28.