Inievo ivẹ mai jọ nọ e rrọ izoge evaọ obọ Russia nọ a re se Brọda Yegor Baranov avọ Sista Darya Dulova a dhesẹ nọ a wo udu dede nọ egọmeti o si obe kẹ ae inọ a be te rehọ ae guẹdhọ evaọ okọto. Yọ ẹsejọhọ a te bruoziẹ kpe ae, a ti fi ai họ uwou-odi oke lelehie. Ikpe ikpegbizii ọvo Brọda Baranov ọ kpako te no, yọ obọnana a fi rie họ ega bẹsenọ a re bruoziẹ na. Ikpe ikpegberee ọvo Sista Dulova ọ jọ nọ elakpa e vẹruọ uwou rai. Inievo ivẹ nana họ enọ e mae maha evaọ usu inievo mai nọ i bu vi 380 nọ Russia o si obe kẹ inọ a thọ uzi egọmeti fikinọ a be gọ Jihova.

Anwọ Asoi 27, 2020 a ro mu Brọda Baranov fihọ ega. Yọ edhọ ivẹ soso eye a tu Sista Dulova evaọ obọ ekọto, nọ a be hẹrẹ bẹsenọ a re bruoziẹ rai na. Ghelọ ebẹbẹ nana kpobi, izoge ivẹ nana a gba riẹ mu nọ a re kru ẹrọwọ rai.

Evaọ Asoi 27, iporisi Russia nọ a re se Federal Security Service (FSB) nọ e wha igbeke a vẹruọ uwou nọ Brọda Baranov avọ oni riẹ a be rria. Kẹsena a te mu oniọvo-ọmọzae na. Obruoziẹ jọ nọ a re se Aleksey Shatilov ọ tẹ ta nọ jọ a fi ei họ ega bọo oke nọ a rẹ rehọ iẹe guẹdhọ, inọ oniọvo na yọ “osu jọ” evaọ ukoko Isẹri Jihova nọ ọ rrọ ẹwho na.

Brọda Baranov ọ ta nọ evaọ oke nọ iporisi e rọ nyaze te kiẹ uwou rai na, a jẹ gwọlọ ru ozọ mu ai. Rekọ oware nọ u ru udu tei otọ họ, olẹ nọ ọ lẹ se Jihova. Ọ ta nọ: “Omọvo iporisi nọ e jẹ kiẹ uwou mai na o muẹrohọ nọ ozọ u mu omẹ hẹ, wọhọ ẹsenọ me je rẹro rai vẹre.”

Brọda Baranov ọ ta nọ ọ jẹ hae jọ udu riẹ ta ẹsikpobi nọ “otẹrọnọ Jihova ọ kuvẹ re oware nana o via, kiyọ mẹ rẹ sai thihakọ riẹ.” Ọ ta re nọ: “Olẹ nọ mẹ be hae lẹ se Ọghẹnẹ ẹsikpobi re ọ dhogbo bru omẹ ze, gbe ẹzi ọfuafo na oye u bi fiobọhọ kẹ omẹ nọ ozọ u gbe bi ro mu omẹ hẹ. U te no ere no, udu o rrọ omẹ awọ keme mẹ riẹ nọ me ru oware uyoma ovo ho. Udu u bi brukpe omẹ hẹ. Fikinọ mẹ be gọ Jihova a bi ro kpokpo omẹ na.”

Nọ a nọ Brọda Baranov epanọ eware e rrọ kẹe evaọ ega nọ a fi rie họ na, ọ ta nọ ozọ ọvo u bi mu ei hi. Ahwo nọ a gbẹ rrọ ega na a rẹ gwọlọ iẹe ẹme he. A be riẹe ru ziezi wọhọ ẹsenọ ọ rrọ oniọvo ọmaha rai. Brọda Baranov ọ ta nọ: “Ahwo nọ ma gbẹ rrọ ega na a riẹ nọ u fo nọ mẹ rẹ jọ etẹe he.”

Evaọ Aria 1, 2018, iporisi e vẹruọ uwou nọ Sista Dulova avọ oni riẹ a be rria. Kẹsena a te mu Sista Dulova. Ọ ta nọ oghẹrẹ nọ a rọ vẹruọ uwou rai, kiẹ uwou na je mu ei na, o kẹ riẹ uye gaga. Rekọ ẹrọwọ riẹ ọ gbẹ rrọ gaga. Ọ ta nọ: “Mẹ gba riẹ mu nọ me re kru ẹrọwọ mẹ. Mẹ rẹ gọ Jihova te urere, ghelọ oware kpobi nọ o via kẹhẹ.”

A mu ẹdhọ Sista Dulova na họ egu evaọ Azie 2019 evaọ okọto nọ o rrọ Karpinsky evaọ ubrotọ Sverdlovsk. Evaọ ubrobọ urere ẹdhọ na, Sista Dulova ọ jọ okọto na ta nọ emamọ oware o te te ohwo obọ, ọ rẹ gwọlọ gbiku riẹ kẹ ahwo. Ọ ta nọ: “Wọhọ oriruo, mẹ riẹ nọ kẹle na, Ọghẹnẹ o ti ru akpọ na soso fihọ aparadase. Yọ u ti gbe kri hi, oghọghọ ọvo o te lẹliẹ irui-oviẹ no ahwo aro ze. Kọ emamọ usi nana u gbe fo oware nọ mẹ rẹ ta kẹ ahwo?”

Ghelọ emamọ ẹme yena nọ ọ ta ududu na, a bruoziẹ kpei ghele evaọ Ọvo 27, 2020. A ta nọ ukpe ọvo soso egọmeti o ti fiẹrohọ Sista Dulova sọ ọ te wariẹ thọ uzi nọ a rọ fiki riẹ mu ei na. Elọya oniọvo na ọ tẹ wariẹ tu ẹdhọ na.

Evaọ Aria 6, 2020, okọto nọ o rrọ ubrotọ Sverdlovsk nọ o wariẹ guẹdhọ Sista Dulova na o te ku oziẹ na rẹriẹ. Okọto na u zihe ẹdhọ na kpohọ okọto Karpinsky nọ a kaki jo guẹdhọ na, re obruoziẹ ọfa ọ keria kẹ ẹdhọ na. A ri fi ẹdẹ họ nọ a ti ro guẹdhọ na ha. Nọ oniọvo na ọ be hẹrẹ ẹdhọ yena, yọ ọ rrọ ẹdhọ ọfa nọ a tu rie avọ oni riẹ gbe Isẹri Jihova esa efa.

Ebẹbẹ nana nọ i te Brọda Baranov avọ Sista Dulova na i wuhrẹ i rai eware buobu no.

Sista Dulova ọ fodẹ eware nọ i fiobọhọ kẹe nọ u fo nọ ma re ru. Ọ ta nọ: “Hai se Ebaibol na, ruẹrẹ oma kpahe kẹ iwuhrẹ ziezi, je wuhrẹ ile ukoko na re usu ra avọ Jihova o ruẹse ga ziezi. Hai roro kpahe eria Ebaibol nọ i re si ozọ no owhẹ ẹro gbe enọ i re ru nọ whọ gbẹ rọ jọ awawa ha.”

Brọda Baranov ọ ta nọ: “Re ohwo ọ sai thihakọ ukpokpoma, usu riẹ avọ Ọghẹnẹ o rẹ kpekpe ziezi. Fikiere whọ raha oke he. Ru eware nọ i re ru usu ra avọ Jihova Ọghẹnẹ kpekpe enẹna.”

Whọ rẹ jọ Ebaibol na se ku iku buobu nọ Jihova o jo fiobọhọ kẹ idibo riẹ nọ e rrọ izoge re a wo udu. Ma riẹ nọ o ti gbe fiobọhọ kẹ izoge mai nọ a bi kpokpo evaọ obọ Russia gbe eria efa evaọ akpọ na.—1 Samuẹle 1:20; 16:18; 2 Ivie 5:1-3; Daniẹl 1:14-17; 3:17-27.