Evaọ Ava 25, 2019, Isẹri Jihova nọ e rrọ Russia a tu ẹdhọ kpohọ okọto European Court of Human Rights (ECHR) re o jowọ kpata kpata kpahe olahiẹ nọ a lahiẹ Brọda Sergey Loginov. Oniọvo nana ọ rrọ usu imahrẹ nọ a gboja kẹ evaọ okpẹwho nọ ọ rrọ ubrotọ Siberia nọ a re se Surgut. A siobọno inievo ezeza evaọ usu imahrẹ nọ a lahiẹ na no, rekọ a gbe fi Brọda Loginov họ uwou-odi be hẹrẹ okenọ a ti ro guẹdhọ riẹ. A nwa riẹ oma evaọ oke olahiẹ na, rekọ a be kuvẹ hẹ re edọkita a nyaze ti siwi ei.

Nọ a nwani tu ẹdhọ na no, okiokiọ riẹ evaọ Ava 26, 2019, okọto ECHR na o tẹ jẹ emamọ owọ kpahe ẹme na. Okọto na o kẹ ọkpọvio inọ egọmeti Russia o ru epanọ utu edọkita nọ i bi ruiruo kẹ egọmeti Russia ha a rẹ rọ kiẹ oma Brọda Loginov riwi “vẹrẹ vẹrẹ.” Onana u ti dhesẹ epanọ olahiẹ na o ga te, gbe epanọ u ro kpomahọ iẹe evaọ “ugboma gbe iroro,” kẹsena a vẹ te riẹ sọ ọ rẹ gbẹ jọ uwou-odi. Okọto na o kẹ egọmeti Russia rite Asa 11, 2019, nọ a re ro ru lele ọkpọvio nana.

Orọnikọ ẹsikpobi okọto ECHR na o rẹ kẹ ọkpọvio nana ha, rekọ nọ a tẹ ruẹ nọ ohwo ọ rrọ uyero nọ o rẹ sai fi uzuazọ riẹ họ ọza, a rẹ jowọ. Fikiere, eva e were omai gaga nọ ma ruẹ nọ okọto ECHR na o jowọ kpata kpata evaọ ẹdẹ nọ o lele i rie nọ a nwani tu ẹdhọ na no. Okọto ECHR na o ta nọ a te hai muẹrohọ oware nọ a bi ru inievo mai evaọ Russia.

Ma be ta ẹme na, Isẹri Jihova 19 egọmeti Russia o tu ẹdhọ kpohọ okọto evaọ ẹwho Surgut, yọ 3 e rrọ uwou-odi be hẹrẹ okenọ a ti ro guẹdhọ rai.

Nọ ma be lẹ roro inievo mai na, joma kareghẹhọ eme uduotahawọ nọ e rrọ obe Jerimaya na: “Oghale u te ohwo nọ o bi fievahọ Jihova, ọnọ o fi udu họ Jihova.”—Jerimaya 17:7.