Evaọ Akpe 9, 2020, okọto nọ a re se Sverdlovskiy District Court nọ o rrọ okpẹwho Kostroma o bruoziẹ kpe Brọda Sergey Rayman avọ aye riẹ, Valeriya. A ti kpohọ uwou-odi hi, rekọ ahwo egọmeti a te hai fiẹrohọ Brọda Sergey Rayman evaọ etoke ikpe eree, yọ ere ọvona a te hai ru aye riẹ re evaọ etoke ikpe ihrẹ. Nọ a jẹ thọ uzi egọmeti jọ evaọ etoke nana, a ve fi ai họ uwou-odi. Anwọ 2017 nọ Supreme Court o ro bruoziẹ kpe inievo mai na, onana họ oziẹ nọ a jọ brukpe inievo mai evaọ Russia nọ unuikpe nọ ahwo egọmeti a te hai ro fiẹrohọ oware kpobi nọ inievo mai a bi ru u ro bu te enẹ. Brọda Rayman avọ aye riẹ a ti kpohọ uwou-odi oke nana ha.