Evaọ Akpe 7, 2020, okọto nọ a re se Mayskiy District Court nọ o rrọ Kabardino-Balkarian Republic o bruoziẹ kẹ Brọda Yuriy Zalipayev inọ ọ rease eware kpobi nọ a gu fihọ iẹe uzou na. Ahwo egọmeti nọ a mu rie na a wo edẹ ikpe nọ a sae rọ wariẹ tu ẹdhọ na.

Ahwo egọmeti na a ta nọ Brọda Zalipayev ọ jẹ tuduhọ amọfa awọ re a ru ozighi. Rekọ, ahwo nọ a bu vi ahwo ọgba a se isẹri inọ Brọda Zalipayev o ru oware utioye na ha. Ukpoye, oware nọ o je ru kpobi họ ọ jẹ tuduhọ amọfa awọ re a se Ebaibol na je dhesẹ uyoyou gbe ẹwo kẹ ahwo kpobi.

U te no ere no, ẹme nọ UN Working Group on Arbitrary Detention o ta kẹle na inọ Isẹri Jihova a re ru ozighi hi yọ a rẹ tuduhọ amọfa awọ re a ru ozighi vievie he na, yọ oware ọfa jọ nọ u ru nọ okọto na o ro bruoziẹ kẹ Brọda Zalipayev nọ ọ rease.

Nọ okọto na o whowho oziẹ na no, Brọda Zalipayev ọ tẹ ta nọ: “Mẹ avọ ahwo uviuwou mẹ gbe egbẹnyusu mẹ kpobi ma je rẹro nọ a ti bruoziẹ kpe omẹ je fi omẹ họ uwou-odi. Me yere Jihova gaga, keme o fiobọhọ kẹ omẹ nọ mẹ gbẹ jẹ rọ ruawa evaọ etoke ẹdhọ na ha. Me yere ohwo kpobi nọ o se isẹri kẹ omẹ inọ mẹ thọ uzi hi.”