Evaọ Akpegbivẹ 17, 2020, okọto Leninskiy District Court of Rostov-on-Don o bruoziẹ kpe Brọda Ruslan Alyev. A ti fi ei họ uwou-odi hi, rekọ ahwo egọmeti a te hai fiẹrohọ iẹe evaọ etoke ikpe ivẹ gbe ubro.

Evaọ edẹ jọ taure ẹdẹ nọ a ro bruoziẹ na, Ruslan o dhesẹ nọ o wo “udhedhẹ Ọghẹnẹ.” (Ahwo Filipai 4:7) Ọ ta kẹ egbẹnyusu riẹ nọ: “Ozọ oziẹ nọ okọto na u ti bru evaọ ẹdhọ na u bi mu omẹ hẹ. Oware kpobi nọ Ọghẹnẹ ọ kuvẹ riẹ oye o te via, yọ o ti fiobọhọ kẹ omẹ evaọ ẹruoke. Mẹ te ruabọhọ egagọ Jihova ghele oria nọ mẹ rrọ kẹhẹ.” Ruslan ọ tẹ jẹ riẹ nọ inievo-emetẹ gbe erọ emezae riẹ wariẹ akpọ na soso họ a be lẹ roro ei re ọ sai thihakọ, yọ ọ ta nọ onana o be kẹe “omosasọ gaga.”

Evaọ eme urere riẹ nọ ọ ta kẹ okọto na evaọ Akpegbivẹ 14, 2020, Ruslan ọ ta ududu nọ: “Evaọ ikpe idu ivẹ (2,000) nọ i kpemu, a jẹ rọ ọzae jọ nọ ọ jọ ikpe 33 guẹdhọ inọ ọ be wọso egọmeti. Rekọ eme nọ a kere fihotọ kpahe ẹdhọ yena i dhesẹ nọ fiki usu nọ o wo kugbe Jihova, Ọghẹnẹ riẹ a jẹ rọ rehọ iẹe gu ẹdhọ na. Eme ahwo nọ a je se isẹri kpei e rọwokugbe ohwohwo ho, yọ iguẹdhọ na a ruẹ oware ovo nọ u dhesẹ nọ ọ reabe he. O make rrọ ere na, a bruoziẹ kpei ghele. Jesu Kristi họ ọzae yena.

“Whaọ nẹnẹ na, o vrẹ ikpe idu ivẹ (2,000) no, mẹ tẹ jẹ rrọ ikpe 33, yọ a gba eku họ omẹ uzou jẹ be rọ omẹ guẹdhọ evaọ okọto inọ mẹ be wọso egọmeti jẹ be wha ozighi fihọ orẹwho na soso. . . . Nọ me yo kpahe eku nọ a gba họ omẹ uzou na inọ mẹ be wọso egọmeti jẹ be wha ozighi fihọ orẹwho na soso, u gbe omẹ unu gaga keme ota gheghe a be bọwo omẹ na.”

Ruslan ọ tẹ jẹ ta nọ eku gheghe a be wọ họ iẹe uzou na inọ o bi ru nọ ahwo uyẹ gbe egagọ sa-sa a bi ro mukpahe ohwohwo. Ọ ta nọ: “Fiki oghẹrẹ nọ eware e jọ, nọ emaha ze mẹ rọ riẹ kpahe iruemu ahwo erẹwho sa-sa wọhọ: Russia, Azerbaijan gbe Ukraine. Iruemu erẹwho esa nana e rẹ were omẹ gaga. . . . Me wo egbẹnyusu nọ i no erẹwho Africa nọ e rẹ ta Oyibo ze gbe enọ e rẹ ta ẹvẹrẹ Chinese. . . . Obọ Azerbaijan a jọ yẹ omẹ. Ahwo kpobi a riẹ kpahe egrẹ nọ o rrọ udevie ahwo Azerbaijan avọ ahwo Armenia nọ o rrọ otọ kri no na, rekọ ogbẹnyusu ọkpekpe mẹ ohwo Armenia, yọ ọye o dikihẹ kẹ omẹ evaọ ẹdẹ nọ mẹ jẹ rọo. Egagọ nọ mẹ rrọ a jo wuhrẹ omẹ re me you ahwo erẹwho, ovioma, gbe egagọ sa-sa, te edafe te iyogbe. . . . Fikiere u bi gbe omẹ avọ ahwo nọ a riẹ omẹ kpobi unu gaga, evaọ eku nọ a gba họ omẹ uzou na inọ mẹ be tuduhọ ahwo awọ re a mukpahe ahwo uyẹ gbe ovioma ọfa, hayo re a rri omarai nọ a woma vi amọfa na.”

Eva e be were omai gaga nọ ma rọ riẹ nọ inievo-emetẹ gbe erọ emezae mai nọ e rrọ obọ Russia a be rehọ uvẹ nọ u rovie fihọ kẹ ai ro se isẹri ududu evaọ okọto. U mu omai ẹro inọ Jihova ọ te ghale omodawọ mai nọ ma be rọ ta usi uwoma na evaọ okọto.​—Matiu 10:18.