Evaọ Akpe 28, 2020, okọto Bryansk Regional Court o rọwo fihọ oziẹ nọ okọto ọsosuọ o brukpe Brọda Vladimir Khokhlov avọ Eduard Zhinzhikov gbe Sista Tatyana Shamsheva avọ Olga Silaeva. Okọto ọsosuọ na o brukpe inievo nana inọ a ti kpohọ uwou-odi ukpe ọvo hayo ukpe ọvo gbe emerae esa. Rekọ, fikinọ a jọ uwou-odi nọ a re fi ahwo họ taure a te ti gu ẹdhọ rai te omoke jọ no, a ti gbe kpohọ uwou-odi hi. Fiki oziẹ nọ okọto na o bru na, a te hae rri inievo nana wọhọ ahwo ugbarugba. Ghele na, eva e be were inievo nana keme siobọno ai no. A jọ Russia wo uzi ọvuọvo nọ ahwo egọmeti na a re lele he, re a wariẹ tu ẹdhọ na jẹ yare nọ a kẹ inievo nana uye nọ o ga vi onana.

Taure okọto ọsosuọ na o te ti bruoziẹ na, yọ inievo-emezae mai na a jọ uwou-odi nọ a re fi ahwo họ taure a te ti gu ẹdhọ rai vrẹ emerae ikpe no, inievo-emetẹ na kọ emerae eree gbọ. Nọ a siobọno inievo-emetẹ na no, a kiẹ rai riwi evaọ Iyẹrẹ 2020 nọ I No Obọ Utu Ẹruorote na Ze, Ọrọ avọ 5. Yọ a ta nọ eware nọ i je fiobọhọ kẹ ae thihakọ avọ evawere họ, edẹro nọ a wo, olẹ, gbe isase Ebaibol.