Evaọ Akpe 28, 2020, okọto nọ a re se Dimitrovgrad City Court nọ o rrọ Ulyanovsk Region o rọwo ho inọ a kaki siobọno Brọda Konstantin Bazhenov no uwou-odi. Ukpoye, okọto na o ta nọ ọ hwa eho rọkẹ unu edẹ nọ i kiọkọ nọ ọ hae rọ jọ uwou-odi na. O wo edẹ ikpe nọ ọ sae rọ wariẹ tu ẹdhọ na.

Evaọ Azeza 2018, nọ a rọ kaki fi Brọda Bazhenov họ uwou-odi taure a te ti gu ẹdhọ riẹ na, ozọ o jẹ dina mu ei. Rekọ, o te mu eria Ebaibol sa-sa họ ekere fihọ obe. Ọ sai kere eria Ebaibol nọ i bu te egba isoi (500) no uzou ze fihotọ. Uwhremu na, o te ti wo Ebaibol, yọ emerae ene o ro sei re. Brọda Bazhenov ọ jẹ rọ eware nọ o wuhrẹ no Ebaibol na ze ro kere ileta se amọfa rọ tuduhọ ae awọ. Ọ jẹ hae so ile ukoko na, yọ ọ jẹ lẹ se Jihova kẹse kẹse re o fiobọhọ kẹe.

Brọda Bazhenov ọ jọ uwou-odi nọ a fi rie họ taure a te ti gu ẹdhọ riẹ na vrẹ edẹ egba esa gbe udhuvẹ (340). A gu ẹdhọ riẹ evaọ Azie 2019, a te brukpei jẹ ta nọ o ti kpohọ uwou-odi evaọ ikpe esa gbe ubro. Ghele na, oniọvo na ọ se Ebaibol nọ o je se na gbe olẹ nọ ọ jẹ lẹ se Jihova ba ha. Ma yere Jihova inọ Brọda Bazhenov ọ sai ru Ekareghẹhọ na evaọ uwou-odi. Emamọ usu nọ Brọda Bazhenov o wo kugbe Jihova họ oware nọ u bi fiobọhọ kẹe thihakọ ukpokpoma nana avọ oghọghọ. Ajọ omai hae lẹ roro Brọda Bazhenov kẹse kẹse.