Evaọ Ava 6, 2019, okọto nọ a re se Zheleznodorozhniy District Court of Oryol u brukpe Dennis Christensen je fi ei họ uwou-odi ikpe ezeza fikinọ o bi wobọ evaọ iruẹru egagọ riẹ. Brọda Christensen ọ te kpare ẹdhọ na kpohọ okọto ọfa nọ u kpehru vi ọyena.

Oziẹ nọ a brukpe Christensen na u ru nọ erẹwho efa a ro dhomahọ ẹme na. Ikoko akpọ-soso wọhọ Council of Europe, the European Union, the United States Commission on International Religious Freedom, the Office of the United Nations High Commissioner for Human Rights, gbe ikoko efa e ta nọ okọto na u brukpe Dennis Christensen ekueku yọ u fo nọ a re fi ei họ uwou-odi hi.

Michelle Bachelet nọ ọ rrọ U.N. High Commissioner for Human Rights, ọ ta nọ: “Oziẹ nọ a brukpe Christensen na o woma vievie he, keme u ti ru nọ a ti ro kpokpo Isẹri Jihova je ru ai wọhọ ahwo ugbarugba fiki egagọ rai, dede nọ a wo udu nọ a re ro ru iruẹru egagọ rai evaọ Russia.” Ọ tuduhọ egọmeti Russia awọ re “a nwene uzi nọ a re se Federal Law on Combating Extremist Activity je ru ei vẹ inọ ahwo nọ a re ru ozighi jẹ lẹliẹ ahwo mukpahe ohwohwo ọvo a re brukpe inọ a be wọso egọmeti.” Nọ Ms. Bachelet o je ku ẹme riẹ họ, ọ vuẹ egọmeti Russia re “a siobọno ohwo kpobi nọ a fihọ uwou-odi fiki egagọ riẹ, ẹrọwọ riẹ, eriwo riẹ, hayo fiki amọfa nọ o bi kuomagbe.”

Nọ a bruoziẹ kpe Brọda Christensen no, edẹ ivẹ nọ i lele i rie, imane jọ nọ e viodẹ nọ a rẹ họre kẹ udu nọ ahwo a re ro ru eware evaọ Russia, a te se ẹgwae evaọ okpẹwho Moscow. Oria nọ a jọ gba ẹgwae na o vọ t’unu, yọ ahwo nọ a bu vi idu ezeza (6,000) a rọ itanẹte thuru kugbe ẹgwae nana nọ a rọ auwa soso gba na no eria sa-sa ze. Ahwo kpobi nọ a ta ẹme evaọ ẹgwae na a jọ abọ Isẹri Jihova; a tẹ jẹ ta nọ ahwo odhedhẹ Isẹri Jihova a rrọ yọ a rẹ gwọlọ ẹme he.

Irina, aye Brọda Christensen gbe elọya riẹ nọ a re se Mr. Anton Bogdanov, gbe oniọvo ọfa nọ o dikihẹ kẹ European Association of Jehovah’s Witnesses nọ a re se Yaroslav Sivulskiy a ta ẹme evaọ ẹgwae na re. A ta ẹme kpahe oziẹ okienyẹ nọ a bru na jẹ kẹ iyo enọ nọ a nọ rai evaọ ẹgwae na.

Dede nọ u te enwenọ ikpe ivẹ no nọ Brọda Christensen ọ rọ rrọ uwou-odi, eva e gbẹ be were iẹe ghele yọ ọ gba riẹ mu nọ o re gbe fievahọ Jihova. Edẹ jọ taure a te ti bruoziẹ na, nọ Brọda Christensen ọ jẹ ta ẹme urere riẹ, ọ ta nọ: “O maki kri kẹhẹ, uzẹme ẹme o rẹ bẹre lahwe; yọ ere o te jọ evaọ ẹme nana re.” Nọ o se obe Eviavia 21:3-5 no, ọ tẹ ta ẹme nana avọ imuẹro ro ku ẹme riẹ họ: “Eme nana  . . . e be ta kpahe oke nọ Ọghẹnẹ o ti ro bruoziẹ okiẹrẹe kẹ ohwo kpobi jẹ kẹ ohwo kpobi uvi ufuoma. Ufuoma gbe oziẹ okiẹrẹe e jẹhọ ohwohwo. Ọghẹnẹ o ti gine ru eme nana gba.”

O vrẹ ẹgbukpe gbe emerae eree no nọ Brọda Christensen ọ rọ rrọ uwou-odi nọ a re se Detention Facility No. 1 evaọ ubrotọ Oryol, yọ ọ be hẹrẹ oke nọ a ti ro guẹdhọ na evaọ okọto nọ ọ kpare ẹdhọ riẹ kpohọ na.