Evaọ Akpegbivẹ 23, 2020, okọto Kemerovo Regional Court nọ Brọda Khasan Kogut ọ wariẹ tu ẹdhọ riẹ kpohọ o rọwo nọ o re gu edhọ na ha. Fiki onana, ikpe ivẹ gbe emera ezeza nọ a kaki bruoziẹ nọ ahwo egọmeti a re ro fiẹrohọ iẹe na u ti muhọ. O ti kpohọ uwou-odi hi.

Dede nọ oziẹ nana nọ a bru na u ti ru nọ a te rọ rehọ ekpehre ubiẹro rri rie evaọ orẹwho na, eva e be were iẹe ghele keme ọ talamu Jihova jẹ riẹ nọ eva riẹ e be were Jihova. Khasan avọ aye riẹ, Yekaterina, gbe ọmọzae rai, Timofey, nọ ọ rrọ ikpe eree, a gba riẹ mu nọ Jihova aikpobi a rẹ gọ te urere.

Nọ ọ jẹ ta eme urere riẹ evaọ okọto na evaọ Azie 10, 2020, Khasan ọ ta ududu nọ: “Me re siobọno ẹrọwọ nọ me fihọ Jihova Ọghẹnẹ vievie he, yọ me rri riẹ nọ ohwo nọ ọ be gba omẹ họ ru ere kpobi ọ thọ uzi! Ere me rri ẹme nana. Ghelọ oware kpobi nọ o via kẹ omẹ kẹhẹ, ‘makọ uwhu hayo uzuazọ hayo ikọ-odhiwu hayo egọmeti, hayo eware nọ e rrọ enẹna hayo eware nọ e te tha hayo ogaga hayo ekpehru hayo edidi hayo omama ofa jọ kpobi o rẹ sae hẹriẹ omai no uyoyou Ọghẹnẹ hẹ.’”​—Ahwo Rom 8:38, 39.