Ikpe ikpe nọ e vrẹ evaọ Azeza 10, 2010, okọto nọ a re se European Court of Human Rights (ECHR) u brukpe egọmeti Russia nọ o bi koko uzi nọ o ta nọ ohwo kpobi o wo ufuoma nọ ọ sae rọ jọ egagọ nọ e were riẹ hẹ, keme anwọ ikpe buobu ze na a be whaha Isẹri Jihova egagọ rai. Okọto ECHR u ho Russia unuigho buobu, jẹ ta kẹ Russia nọ a wariẹ fi odẹ egagọ Isẹri Jihova hotọ evaọ okpẹwho Moscow wọhọ egagọ efa, onọ egọmeti Russia a si no evaọ ukpe 2004.

Nọ a nwani bruoziẹ na no, Brọda Ivan Chaykovskiy, nọ ọ jọ ohwo-agbara rọkẹ Moscow Community of Jehovah’s Witnesses ọ ta nọ: “Oziẹ nọ a bru na u dhesẹ nọ a kuvẹ re omukpahọ egagọ u su ai hi, ukpoye a roro ẹme na te ziezi. Me bi rẹro nọ egọmeti na ọ te kẹ omai ufuoma nọ u fo nọ ma re wo ababọ oke oraha jẹ siọ Isẹri Jihova ba ekpokpo evaọ orẹwho na soso.”

Rekọ oware nọ o je rẹro riẹ na o via vievie he keme egọmeti Russia o rọwo ru lele oziẹ ECHR na ha, ukpoye a te tube mu inievo mai họ ekpokpo vi epaọ anwẹdẹ evaọ orẹwho na soso. Ukpokpoma na o ga viere nọ Okọto nọ O Mai Kpehru evaọ Russia o whaha egagọ mai riẹriẹriẹ evaọ 2017. Yọ anwọ okenọ a ro bruoziẹ okienyẹ yena, a bi mu inievo mai, rehọ ai kpohọ ekọto, je fi ai họ uwou-odi.

Dede nọ ikpe ikpe e vrẹ no, oziẹ nọ Okọto ECHR u brukpe egọmeti Russia na u gbe wiruo. Evaọ 2010, Okọto ECHR na u dhesẹ vevẹ nọ eware buobu nọ egọmeti Russia o be ta nọ inievo mai a bi ru makọ rite inẹnẹ na yọ eku gheghe nọ a be wọ họ ae uzou.

Ukuhọ riẹ Okọto ECHR o tẹ ta nọ Moscow Justice Department gbe ekọto Moscow kpobi a wo “ẹjiroro ọvo nọ o rọwo kugbe uzi hi” nọ a gbe ro fi odẹ egagọ Isẹri Jihova hotọ wọhọ egagọ efa ha. Okọto na u brukpe egọmeti Moscow jẹ ta nọ “a dhesẹ oruọzewọ gbe ababọ ọriẹwẹ hẹ wọhọ epanọ u fo nọ a re ru.” U te no ere no, Okọto na o ta nọ egọmeti Moscow o raha uzi European Convention on Human Rights, onọ orẹwho Russia o rọwo fihọ nọ a re koko.

Wọhọ epanọ o jọ evaọ 2010 na, ahwo a be ruẹ epanọ egọmeti Russia o bi kienyẹ je kpokpo inievo mai evaọ ukpe 2020 nọ ma rrọ na. Aye jọ nọ a re se Rachel Denber nọ ọ rrọ ethabọ osu evaọ ukoko jọ nọ a re se Human Rights Watch rọkẹ Europe avọ Central Asia ọ ta nọ: “Re Isẹri Jihova nọ e rrọ Russia a wobọ evaọ iruẹru egagọ rai, o rẹ sae lẹliẹ ufuoma nọ a wo kpobi vru mi ai.” Evaọ Ọvo 9, 2020, ọ ta re nọ: “U wo emamọ ẹjiroro ọvuọvo nọ a re ro ru Isẹri Jihova enẹ vievie he.”

Nọ a bi kienyẹ inievo-emezae gbe erọ emetẹ mai nọ e rrọ Russia na, ma be lẹ se Jihova nọ ọ gbẹ kẹ ae ẹgba nọ a sai ro “thihakọ eware kpobi avọ odiri gbe oghọghọ,” yọ u mu omai ẹro nọ o ti ru ere.—Ahwo Kọlọsi 1:11.