Evaọ Akpe 12, 2016, Okọto Ubrotọ Tverskoy nọ o rrọ okpẹwho Moscow, o kpare ẹdhọ nọ Isẹri Jihova a wariẹ tu na kufiẹ onọ Elọya nọ Ọ Mai Wuzou evaọ orẹwho na ọ rọ vẹvẹ ai unu nọ a te whaha iruo Uwou Ogha Isẹri Jihova nọ o kẹle St. Petersburg na. Obe nọ a kere evaọ Asa 2, 2016 rọ vẹvẹ Isẹri Jihova unu na o ta nọ orọnikọ Uwou Ogha na dẹẹ o be “wọso egọmeti” hi, rekọ ikoko sa-sa Isẹri Jihova jọ nọ e rrọ orẹwho na. Fikinọ Uwou Ogha na oye u wuzou iruo Isẹri Jihova evaọ orẹwho na soso, a tẹ ta nọ Uwou Ogha na oye egọmeti Russia o re kru. Eware nọ a ta nọ Isẹri Jihova i bi ru nọ e be “wọso egọmeti” na yọ eware sa-sa nọ a rehọ ze gbe isẹi erue nọ isu okegbe na a rọ gba eku họ Isẹri Jihova uzou. Evaọ oke ẹdhọ na, obruoziẹ na ọ tubẹ rọwo gaviezọ kẹ Isẹri Jihova tao ho re a rehọ isẹri ze hayo re a kporo ividio sa-sa nọ a rekọdo nọ i dhesẹ epanọ ae ọvo a rọ nyai fi ebe Isẹri Jihova nọ a be ta nọ e wọso egọmeti, nọ a ruẹ evaọ eria egagọ Isẹri Jihova na họ iẹe.

Isẹri Jihova a te wariẹ tu ẹdhọ na kpohọ Okọto ofa nọ o rrọ Moscow. Otẹrọnọ okọto na u brukpe ai, kiyọ a ti fi ẹme Elọya nọ Ọ Mai Wuzou evaọ orẹwho na họ iruo, yọ oyena u dhesẹ nọ a ti mu Isẹri Jihova nọ e rrọ Russia soso họ ekpokpo fiki egagọ rai. Nọ orọnọ a kaki bruoziẹ kpe Isẹri Jihova no vẹre na jẹ rehọ eware ekpokpọ efa ze rọ gba eku họ ai uzou inọ a be “wọso egọmeti na, Elọya nọ Ọ Mai Wuzou evaọ orẹwho na ọ sae jowọ epanọ a rẹ rọ kare Uwou Ogha Isẹri Jihova na kufiẹ.