Evaọ Ava 9, 2017, Okọto nọ O Mai Kpehru evaọ orẹwho Russia u bruoziẹ nọ a whaha egagọ ukoko Isẹri Jihova nọ o rrọ Birobidzhan [Birobidzhan Local Religious Organization (LRO)]. Okọto na o whobọhọ oziẹ nọ okọto osese jọ u bru vẹre inọ a whaha egagọ Isẹri Jihova nọ e rrọ ẹwho na fikinọ a bi ru eware vrẹta.

A bru oziẹ nana fiki eware nọ ahwo egọmeti ọvo a ru nọ a rọ gba eku fihọ Isẹri Jihova uzou. Evaọ Ava 2015 gbe Ọvo 2016, elakpa a lẹlẹ fi ebe egagọ nọ egọmeti ọ whaha ahwo nọ a wo ho fihọ uwou nọ Isẹri Jihova a haya be jọ ru egagọ rai, kẹsena ae ọvo a tẹ kiẹ ebe nana via. Wọhọ onọ a ru evaọ amara Ọvo, oghẹrẹ utu iporisi jọ nọ a wuhrẹ ziezi nọ i ku eware ruru ovao rai, a nyaze te whaha Isẹri Jihova egagọ rai a tẹ lẹlẹ fi ebe jọ họ otọ agbara jọ evaọ uwou na evaọ iraro ahwo nọ e nyaziọ egagọ na.

Ukoko Isẹri Jihova nọ o rrọ Birobidzhan, evaọ Jewish Autonomous Region evaọ Russia, họ ukoko ọsosuọ nọ a whaha iruẹru egagọ rai anwẹnọ Okọto Okpẹwho Moscow o ro bruoziẹ inọ a re ru lele unuovẹvẹ nọ Ọnọ O Wuzou Ẹme-Ofihọ Okọto Evaọ Orẹwho na ọ kẹ kpahe oria nọ u wuzou iruẹru Isẹri Jihova evaọ orẹwho na.