Evaọ Akpe 18, 2016, Okọto Ukpehru Russia a rọwo kugbe oziẹ nọ okọto osese ẹwho na a bru kpahe Isẹri Jihova nọ e rrọ Orel, inọ ahwo ugbarugba a rrọ. Onana họ orọ avọ ihrẹ nọ Isẹri Jihova a be gwọlọ fi odẹ ogbẹgwae rai họ otọ rekọ ekọto Russia a kẹ rai uzou sokpọ họ, keme anọ Isẹri Jihova yọ ahwo ugbarugba nọ a bi koko izi egọmeti hi.

Ahwo ẹwho Orel a daoma no vẹre re a whaha iruẹru Isẹri Jihova evaọ ẹwho na fiki isẹ erue jọ nọ a se kpahe ae. Ghele na, fikinọ omodawọ rai u wo iruo ho, evaọ Asoi 2016, Ogbẹgwae Ẹdhoguo nọ o rrọ Orel o tẹ bọwo Isẹri Jihova ota nọ ahwo ugbarugba a rrọ.

Ẹdhọ nana o wuzou gaga keme Isẹri Jihova nọ e rrọ Orel ae a kaki si obe se ro si ae ozọ taure Elọya nọ ọ mai wuzou evaọ orẹwho na o te ti vi obe se ọfisi Isẹri Jihova nọ ọ rrọ orẹwho na soso rọ vẹvẹ ai unu evaọ Asa 2016.