Ahwo nọ a rẹ niyẹrẹ a ta nọ, kele na, nọ ahwo egọmeti Russia a kiẹ iwou Isẹri Jihova jọ riwi evaọ ubrotọ Kirov evaọ obọ Russia, ahwo egọmeti na a ta nọ a ruẹ “ekwakwa-ẹmo” jọ nọ Isẹri Jihova a wo. Rekọ, uwou ohwo jọ nọ ọ rrọ Osẹri Jihova ha, ahwo egọmeti na a jọ ruẹ eware nana nọ a be ta nọ a ruẹ na. Eware esa a ruẹ, yọ eware esa na họ, ebọmbo ivẹ nọ a rẹ rọ obọ gbolo gbe ọvo nọ a rẹ tọ fihọ otọ nọ a ro fi Ẹmo Akpọ Avivẹ nọ i mu ekagba no, nọ i gbe wo iruo ho. Aye ohwo nọ o wo eware nana yọ Osẹri Jihova, rekọ ọ tubẹ riẹ nọ ọzae riẹ o wo eware itienana fihọ uwou dede he.

Ohwo nọ o wo eware nana, ọ jọ ohwo nọ o wuzou utu ahwo Russia nọ a jẹ gwọlọ isoja nọ a kpe evaọ Ẹmo Akpọ Avivẹ re a sai ki ai emamọ ukio, yọ a jọ Russia riẹ utu ahwo nana ziezi. A re se ae “Poisk,” hayo “Search.” Evaọ oke nọ a je ru iruo nana, a rẹ ruẹ eware nọ a ro fi ẹmo nọ i gbe bi ru iruo ho.

U bi gbe omai unu hu inọ egọmeti Russia o be wọ eku họ omai uzou jẹ be raha odẹ mai dede nọ mai yọ ahwo udhedhẹ, keme Jesu ọ ta nọ ahwo ọwọsuọ a te “ta oghẹrẹ erue iyoma kpobi kpahe” ilele riẹ.—Matiu 5:11.