Ogbẹgwae Uvi-Oziẹ Russia u tu Isẹri Jihova ẹdhọ kpohọ Okọto Ukpehru orẹwho na, nọ o be rọ gwọlọ “brukpe Isẹri Jihova, re o je fi awhaha họ iruo rai, je mi Isẹri Jihova Uwou Ogha rai gbe eware nọ a wo kpobi, keme o ta nọ Isẹri Jihova a be wọso egọmeti.” Evaọ Asa 15, 2017, Okọto Ukpehru na o tẹ jọ oria evuẹ itanẹte rai ta nọ a ruẹ obe nọ Ogbẹgwae na u si se Isẹri Jihova na. Obe nọ a si inọ a te kare Uwou Ogha na kufiẹ na u te ti te Uwou Ogha obọ, yọ a tẹ ruẹ nọ ẹdhọ na o ti muhọ evaọ ighọjọ ikpe ohiohiẹ Ane 5, 2017.

Otẹrọnọ Okọto Ukpehru na o rọwo fihọ ẹme Ogbẹgwae Uvi-Oziẹ na, kiyọ uye ulogbo o rrọ obaro hẹrẹ Isẹri Jihova nọ e rrọ Russia kpobi. A sai mi Isẹri Jihova eria egagọ rai nọ a ro mudhe kpobi, udu nọ egọmeti ọ kẹ Isẹri Jihova nọ a re ro ru eware nọ i bu te 400, yọ a sai mu omomọvo Isẹri Jihova nọ i bu vi 170,000 nọ e rrọ Russia họ ekpokpo wọhọ ahwo ugbarugba nọ a te kokohọ bi ru iwuhrẹ je se Ebaibol kugbe, hayo nọ a tẹ be vuẹ amọfa oware nọ a jọ Ebaibol wuhrẹ.

Vasiliy Kalin nọ o dikihẹ kẹ ahwo Uwou Ogha Russia ọ ta nọ: “Oware nọ mai Isẹri Jihova evaọ Russia ma gwọlọ kpobi họ, re a kẹ omai uvẹ gọ Ọghẹnẹ mai dhedhẹ. Keme anwọ ikpe udhusoi (100) ena nọ egọmeti Russia o bi ro thihi izi nọ ọye ọvo o fihọ yaotọ, izi evona nọ e kẹ omai udu nọ ma sae ro ru egagọ mai na. Ọmaha gheghe mẹ jọ okenọ Stalin o mu uviuwou mai kpohọ Siberia fikinọ mai yọ Isẹri Jihova. Oja yena ọvona emọ mẹ gbe iruọmọ mẹ a be te jẹ re na, u yoma kẹhẹ. Me roro ẹdẹvo ho inọ evaọ oke nana Isẹri Jihova a te wariẹ reoja fiki egagọ evaọ Russia.”