Evaọ Ọvo 16, 2017, okọto Moscow City o rọwo ho inọ a re gu ẹdhọ nọ Isẹri Jihova a wariẹ tu kpahe unuovẹvẹ nọ ọnọ o wuzou ẹme-ofihọ okọto evaọ orẹwho na soso ọ kẹ inọ a ti mi Isẹri Jihova oria nọ u wuzou iruẹru egagọ rai na. Ogbẹgwae ibruoziẹ esa na o rọwokugbe eware nọ eriẹ-izi Isẹri Jihova a fodẹ vievie he, fikiere nọ a no eriosehọ iminiti ikpe ze no, a te bruoziẹ rai. A whobọhọ oziẹ nọ a bru evaọ Akpe 12, 2016, onọ okọto nọ a re se Tverskoy District Court u jo bru kẹ ọnọ o wuzou ẹme-ofihọ okọto orẹwho na soso. Unuovẹvẹ nọ a kẹ na u mu iruo họ evaọ Asa 2, 2016. Rekọ ma re nwane riẹ epanọ unuovẹvẹ na u ti kpomahọ ufuoma egagọ Isẹri Jihova evaọ Russia ha.