Ekọto orẹwho Moscow a fi ẹdẹ họ no nọ a te rọ wariẹ gu ẹdhọ nọ Isẹri Jihova a tu evaọ Russia nọ a rọ vẹvẹ ai unu nọ a te kare ọfisi iruo egagọ rai. Evaọ Ọvo 16, 2017, nọ oke ahwo Moscow ọ tẹ rehọ iminiti ikpe rọ vrẹ ighọjọ ikpegbọvo no evaọ ohiohiẹ, ekọto o vẹ te keria kẹ ẹdhọ nọ Isẹri Jihova a tu na, yọ ẹsejọhọ ẹdẹdẹ yena a ti bruoziẹ na.

Isẹri Jihova a gwọlọ jẹ ahwo riẹ nọ ota nọ a bọwo rai inọ a rrọ ahwo ugbarugba na, yọ ekru nọ isu ẹwho na a gba họ ai uzou be rọ raha odẹ egagọ rai. Evaọ Akpe 12, 2016, nọ a keria re a yo ẹdhọ nọ a tu na, obruoziẹ nọ a re se M. S. Moskalenko evaọ Tverskoy District Court of Moscow ọ rọwo nọ a gu ẹkẹ unu rai hayo kporo ividio nọ a jọ dhesẹ eware iyoma nọ ahwo egọmeti jọ a ru via ha.

Elọya nọ a re se James Andrik nọ ọ rẹ gwọlọ nọ a vẹ ẹdhọ tu hu, ọ ta nọ: “Oghẹrẹ kpobi nọ a re gu ẹdhọ nana kẹhẹ, ahwo Ekọto Moscow a tẹ ta nọ Isẹri Jihova a re abe, Elọya nọ ọ mai kpehru evaọ orẹwho na o ve ti ru oware nọ ọ ta nọ o ti ru Isẹri Jihova na. A sae kare iwou ọfisi egagọ rai je fi awhaha họ iruẹru rai kpobi riẹriẹriẹ evaọ Russia. Rekọ evaọ abọdekọ riẹ, ekọto na a tẹ riẹ oziẹ na bru, kiyọ oma o fọ Isẹri Jihova no.”