Evaọ ubrobọ ekuhọ Azie 2018, ẹnyaharo ologbo ọ romavia evaọ iruẹru Isẹri Jihova nọ e rrọ Rwanda. Re a sae ta usi uwoma na evaọ evẹrẹ nọ ahwo a be ta evaọ ẹkwotọ na, a ru ọruẹrẹfihotọ jọ: a mu eware mai họ ẹfa fihọ Ẹvẹrẹ Obọ rọ t’Ẹme Rwanda (RWS). Ọruẹrẹfihotọ nana o te wha erere se inievo mai nọ i diezọ nọ i bu te udhusoi gbe ikpegbesa (113) nọ e be rria Rwanda. Onana u ti je fiobọhọ kẹ iwhowho-uvie ruẹrẹ oma kpahe ziezi re a sae ta usi uwoma kẹ ahwo nọ a diezọ gbe enọ i bi yo ẹme tere he evaọ orẹwho na nọ i bu vi idu ọgba (30,000).

Utu efafa Ẹvẹrẹ Obọ rọ t’Ẹme Rwanda na a fa ibroshọ na Gaviezọ kẹ Ọghẹnẹ re Whọ Rria Bẹdẹ Bẹdẹ fihọ Ẹvẹrẹ Obọ rọ t’Ẹme Rwanda no gbe ividio ọkpẹkpẹe na Fikieme Who re ro Wuhrẹ Ebaibol Na? A tẹ jẹ fa emebe evẹvẹ sa-sa nọ e rrọ Ẹkpẹti Ekwakwa Ewuhrẹ mai na no. A ti fi eware nana họ oria itanẹte mai nọ eka jọ e tẹ vrẹ no.

Iminiti isoi ohwo ọ rẹ rọ nya no oria nọ utu efafa RWS na o be jọ ru iruo te uwou ogha Rwanda evaọ Kigali. Inievo-emezae ivẹ gbe inievo-emetẹ ivẹ a rrọ utu efafa na, yọ evaọ usu inievo-emezae ivẹ na, ọvo jọ o diezọ. Aikpobi nọ a rrọ utu efafa na a riẹ ẹvẹrẹ obọ rọ t’ẹme ziezi, yọ a kpohọ isukulu ẹvẹrẹ obọ rọ t’ẹme evaọ eka ene re a riẹ kpahe epanọ a re ru iruo efafa.

Omọvo jọ evaọ utu efafa RWS na nọ a re se Rwakibibi Jean Pierre, ọ ta kpahe ebẹbẹ nọ ohwo ọ rẹ rẹriẹ ovao dhe nọ ọ tẹ be fa ẹme fihọ ẹvẹrẹ obọ rọ t’ẹme, inọ: “Abọ gbe ovao ahwo nọ a diezọ a rẹ rọ ta ẹme, fikiere efefafa na a rẹ fa eware nọ a kere fihọ ividio evaọ edhere obọdẹ jọ. A rẹ drọ iwoho fihọ ebọdo ọfuafo ro dhesẹ ẹme nọ a kere fihọ obe. Kọ iwoho nana efefafa a re rri rọ fa ẹme fihọ ẹvẹrẹ obọ rọ t’ẹme. Re efefafa a ruẹ nọ eware nọ a fa na e rrọ vevẹ nọ a re wo otoriẹ rai jẹ rrọ gbagba, utu Isẹri Jihova jọ nọ i diezọ a rẹ kiẹ eware nọ a fa na riwi, kẹsena a vẹ ta epanọ a roro kpahe efafa na gbe epanọ a sai ro ru ai woma viere nọ o tẹ gwọlọ.”

Augustin Munyangeyo họ ohwo-agbara ukoko jọ nọ u re fiobọhọ kẹ ahwo nọ i diezọ evaọ Rwanda nọ a re se Rwanda National Union of the Deaf. Ọ ta kpahe iruo efafa ẹvẹrẹ obọ rọ t’ẹme nọ Isẹri Jihova a bi ru inọ: “Ma jiri Isẹri Jihova gaga nọ a be rọ rehọ Ebaibol na gbe ividio wuhrẹ ahwo re a riẹ Ọghẹnẹ evaọ Ẹvẹrẹ Obọ rọ t’Ẹme Rwanda.”

Evaọ akpọ na soso, Isẹri Jihova a be fa ebe rai fihọ evẹrẹ obọ rọ t’ẹme nọ i bu vi udhone gbikpe. A te je wo oware jọ nọ a re ru fihọ ifonu gbe ekọmputa nọ a re se JW Library Sign Language^®, nọ ohwo ọ sae jọ ruẹ ebe nọ a fa fihọ evẹrẹ obọ rọ t’ẹme nọ i bu vi udhone gbikpe. Ebe evẹrẹ obọ rọ t’ẹme nana kpobi i bi fiobọhọ kẹ inievo mai evaọ akpọ na soso ta usi uwoma “kẹ orẹwho, orua, ẹvẹrẹ gbe utu ahwo kpobi.”—Eviavia 14:6, ẹme-obotọ.