Elọya egọmeti South Korea a vuẹ okọto jọ evaọ South Korea inọ a bruoziẹ kẹ inievo-emezae isoi mai jọ nọ e siọ iruo isoja fiki ẹrọwọ rai. Onana họ orọ ọsosuọ nọ oware utiona o rọ via evaọ orẹwho na. Okọto na u te gine bru kẹ inievo na jẹ rọ ere ku ẹdhọ na họ. A kake jọ ekọto esese bru kpe inievo mai na inọ a be dhozọ iruo isoja, rekọ oziẹ nọ okọto ulogbo na u bru na u si oziẹ ekọto esese na no otọ.

A bruoziẹ na evaọ Akpegbivẹ 14, 2018. Oziẹ na u ru nọ a ro bru kẹ inievo mai efa nọ i bu vi egba izii (900), enọ edhọ rai e jọ ekọto fiki ẹme ọvona. Inievo mai nọ a bruoziẹ kẹ na a te hẹrẹ re egọmeti ọ kẹ ae iruo efa nọ a re ru viukpọ iruo isoja.

Iziẹ ivẹ jọ nọ Okọto nọ O Mai Kpehru evaọ Korea u bru evaọ 2018 oye okọto na u rri ro bruoziẹ kẹ inievo na. U te ikpe 65 no nọ a rọ jọ Korea fi uzi họ inọ ohwo kpobi nọ ọ siọ iruo isoja, a re fi ei họ uwou-odi o tẹ make rọnọ o ru ere fiki egagọ nọ ọ rrọ. Rekọ uzi yena u no otọ fiki iziẹ ivẹ nọ Okọto nọ O Mai Kpehru na u bru na.

Ikoko jọ nọ a re se human rights organizations a jiri Okọto nọ O Mai Kpehru na fiki iziẹ nọ a bru na keme i ru rie lọhọ nọ ohwo kpobi ọ sae rọ jiroro kẹ omariẹ sọ o re kuomagbe iruo isoja hayo o re ru ere he. Ukoko Korea jọ nọ a re se The National Human Rights Commission o ta nọ: “Anwọ ikpe 1950 ze, a rẹ kẹ ohwo kpobi nọ ọ siọ iruo isoja uye wọhọ epanọ a re ru ogbulegbu. Ahwo nọ a ruẹ uye yena no a bu te enwenọ idu udhe (20,000). Rekọ iziẹ ivẹ nọ Okọto nọ O Mai Kpehru na u bru na u si oware yena no otọ no . . . Uye nọ o bẹ ahwo nọ a siọ iruo isoja gbe ahwo iviuwou rai evaọ etoke yena kpobi na o da omai gaga.”

Enẹna a rẹ ta kẹ ahwo kpobi nọ a siọ iruo isoja re a kẹ “imuẹro” nọ i gine dhesẹ nọ a be siọ iruo isoja fiki ẹrọwọ rai. A vuẹ ibruoziẹ ekọto re a ruẹ nọ ginọ fiki emamọ ẹjiroro jọ ohwo na ọ be rọ siọ iruo isoja na. Ẹme jọ nọ a jọ Okọto nọ O Mai Kpehru na ta họ, “Oware nọ ohwo ọ be rọ fiki riẹ siọ iruo isoja . . . o rẹ jọ oware nọ u kiekpahe kabọ kabọ uzuazọ ohwo na.” Nọ ibruoziẹ na a jẹ nọ inievo mai enọ, inievo na a rọ uvẹ yena se isẹri jẹ ta kpahe ọtamuo rai inọ a re siomano ẹmo-ofio gbe iruo isoja.—1 Pita 3:15.

O vrẹ ikpe udhosa soso no nọ Isẹri Jihova nọ e rrọ Korea a bi ro thihakọ uwou-odi nọ a bi fi ae họ fikinọ a siọ iruo isoja. A jẹ rọ ithihakọ rai dhesẹ nọ ẹjiroro nọ a gbe bi ro wobọ evaọ ẹmo-ofio ho họ, a gwọlọ rọ udu rai kpobi yoẹme kẹ ujaje avivẹ nọ o mae rro na nọ o ta nọ ‘ma re you ọrivẹ mai wọhọ omobọ mai.’—Matiu 22:39.