A ruẹrẹ uwou nọ a be rria evaọ uwou ogha Korea. A ku iruo na họ evaọ edẹ 30 amara Ane, 2023. Uwou na u kri te ikpe ọgba no. A ruẹrẹ oria nọ a rẹ jọ re emu gbe ibruwou udhosa gbe ivẹ nọ a be rria. A ruẹrẹ iwou na re e sai kiehọ ahwo uviuwou Ebẹtẹle oma ziezi, a vẹ jẹ sai ru ai dhẹ hayo rrorro lọlọhọ. Evaọ usu inievo udhoree gbikpe (170) nọ e fialoma ze kẹ iruo na, inievo udhosa gbe ikpegbọvo a ri wobọ evaọ iruo ebabọ ukoko na ẹdẹvo ho. Rekọ inievo na a fi eware nọ a wuhrẹ i rai họ iruo ziezi evaọ etoke ebabọ na. Nọ iruo ebabọ uwou ogha Korea na i kuhọ no, inievo udhuvẹ evaọ usu rai a tẹ fialoma via re a hai fiobọhọ evaọ iruo ebabọ ukoko na evaọ erẹwho efa.

Sista Kim Ha-yeon ọ ta nọ: “Fikinọ a nabi wuhrẹ omai ziezi evaọ etoke iruo ebabọ uwou ogha Korea na, mẹ be sai fiobọhọ evaọ iruo ebabọ ukoko na evaọ orẹwho Indonesia, yọ onana o be lẹliẹ eva were omẹ gaga.”

Brọda Lee Myong-Hoon nọ o ru iruo evaọ uwou ogha Korea na re ọ ta nọ: “Me wuhrẹ eware buobu evaọ etoke ebabọ na. Dede nọ iruo nọ me je ru e jọ gaga, eware nọ ukoko Jihova a wuhrẹ omai kpahe epanọ a sai ro ru iruo ababọ omonwa, i fiobọhọ kẹ omẹ ru iruo na lọlọhọ.” Enẹna, Brọda Lee o bi fiobọhọ evaọ iruo ebabọ nọ a bi ru evaọ Philippines, yọ eva e be were iẹe.

Eva e were omai nọ iruo ebabọ nọ a je ru evaọ uwou ogha Korea na i kuhọ no. Nọ ma te roro kpahe epanọ ahwo nọ a fialoma ze kẹ iruo ebabọ na a daoma te, gbe epanọ a bi ro fiobọhọ evaọ iruo ebabọ ukoko na efa, ma re yere Ọghẹnẹ rọkẹ ‘iruo ẹrọwọ rai gbe iruo egaga nọ a bi ru fiki uyoyou.’​—1 Ahwo Tẹsalonika 1:3.