Onana họ orọ ọsosuọ nọ o rọ via evaọ ikuigbe South Korea, egọmeti South Korea o mu ahwo nọ a rọwo nọ a re kpohọ iruo isoja ha fiki ẹrọwọ egagọ rai uvẹ họ ẹkẹ no re a ru iruo nọ ahwo nọ a rrọ isoja ha a re ru. Evaọ Akpe 26, 2020, inievo udhosa-gbesa mai a rọwo oghẹrẹ iruo nana, ere a ro mu iruo nọ o te rehọ ai ikpe esa họ eru evaọ uwou-odi jọ. Iruo nọ a te hai ru họ, a ti there emu jẹ ghale emu na, nyae dẹ eware, wuhrẹ ahwo na, ru ẹfuọ, rẹrote ahwo nọ a be mọ, gbe iruo aruẹrẹ. Uzi jọ nọ egọmeti na o fihọ obọnana họ, nọ inievo na a te ru iruo na te emerae ivẹ no, a vẹ te hae kẹ abọvo rai uvẹ nya no ighẹ uwou-odi na kpohọ ewuhrẹ gbe usi uwoma nọ a te ru iruo rai re no evaọ okpẹdoke na. Rekọ ohwo kpobi nọ o no uwou-odi na ruọ otafe, ọ rẹ rria kri vrẹ ighọjọ izii owọwọ họ.

Brọda Kim Hyun-soo nọ ọ rrọ omọvo inievo udhosa-gbesa na ọ ta nọ: “Dede nọ ọruẹrẹfihotọ nana o nwani lele izi kpobi nọ a bi lele evaọ akpọ na soso ho, mẹ rọwo nọ me re ru iruo nana keme iruo na e rrọ iruo isoja ha yọ orọnikọ isoja e be rẹrote iruo na ha.”

U mu omai ẹro nọ inievo mai nana nọ e gbẹ rrọ uzoge nọ i bi kru ẹrọwọ rai evaọ South Korea na a te gbẹ wha oruaro gbe ujiro se Jihova ẹkwoma “iruo iwoma rai.”​—Matiu 5:16.