Evaọ 2019, a mu iruo ebabọ họ evaọ uwou ogha Thailand. A gwọlọ nọ a rẹ bọ iwou ekpokpọ jọ jẹ ruẹrẹ efa. Inievo buobu evaọ orẹwho na a fialoma via kẹ iruo na, yọ efa i no erẹwho efa ze. Rekọ fiki okpẹyao COVID-19 na nọ o duwu lahwe, evaọ usu inievo udhuvẹ gbikpe nọ i no erẹwho efa ze, enwenọ aikpobi a zihe kpo, eree ọvo i te kiọkọ. Nọ awhaha COVID-19 na o bi no otọ no ẹmẹrera, a tẹ wariẹ mu iruo na họ. Ofariẹ, a zizie inievo nọ e fialoma ze kẹ iruo na evaọ orẹwho na re a wuhrẹ ae iruo ebabọ, kẹsena a ve fiobọhọ ru iruo ebabọ na re. A ku iruo ababọ na họ evaọ ẹdẹ avọ 30 amara Ane, 2023.

Brọda Setthasat Tawansirikul avọ aye riẹ Waraporn, a jọ usu ahwo nọ a fialoma via evaọ orẹwho na. Evaọ oke ọsosuọ a jẹ ruawa keme a wo onaa iruo ebabọ họ. Brọda Setthasat ọ ta nọ: “Nọ ma te obei, a te wuhrẹ omai iruo ebabọ.”

Inievo buobu evaọ orẹwho na nọ a fialoma ze kẹ iruo ebabọ nana, eva e were rai gaga. Onana u ru nọ inievo na buobu a rọ fialoma via kẹ oghẹrẹ iruo odibọgba oke-kpobi efa. Ejọ a bi ru iruo evaọ iruo ebabọ ukoko na evaọ eria sa-sa, evaọ ẹkwotọ uwou ogha Thailand. Oniọvo-ọmọtẹ jọ evaọ usu rai o kpohọ Isukulu Rọkẹ Etausiuwoma Uvie Na. Efa a bi ru iruo evaọ Ebẹtẹle enẹna. Oniọvo jọ evaọ usu rai nọ o bi ru iruo evaọ Ebẹtẹle nọ a re se Rapeepat Woradetsakul, ọ ta nọ: “Jihova o fiobọhọ kẹ omẹ evaọ etoke iruo ebabọ na, yọ onana o kẹ omẹ udu nọ mẹ sai rọ fialoma via inọ me re ru iruo evaọ Ebẹtẹle. Mẹ riẹ nọ Jihova o ti fiobọhọ kẹ omẹ evaọ iruo Ebẹtẹle na re.”

Evaọ etoke iruo ebabọ uwou ogha Thailand na, a ruẹrẹ iwou nọ a be rria gbe ifisi. Yọ a bọ uwou ọkpokpọ nọ a rẹ kwa eware nọ a be rọ rẹrote uwou ogha na gbe eware efa fihọ, gbe eria ọkpokpọ ọfa nọ a rẹ dhẹ imoto fihọ. Ofariẹ, a dẹ iwou ezeza jọ nọ e kẹle uwou ogha na, a tẹ ruẹrẹ ae kẹ uviuwou Ebẹtẹle nọ a rẹ rria.

Eva e were omai nọ inievo mai nọ e rrọ Thailand a fialoma ze kẹ iruo Jihova, yọ a be ruẹ epanọ eme nọ e rrọ obe Olezi 34:8 i bi ro rugba evaọ omarai. Oria na o ta nọ: “Dawo re whọ ruẹ nọ Jihova o woma.”