Brọda David Petrosov nọ ọ rrọ ikpe ikpegbizii ọ be rria Turkmenistan. Dede nọ ọ gbẹ maha omojọ, ọ rẹriẹ ovao dhe ukpokpoma fiki ẹrọwọ riẹ. Ọ rria uwou-odi evaọ ukpe ọvo soso fikinọ ọ rọwo nọ o re ru iruo isoja ha, kẹsena a te siobọnoi evaọ Azie 30, 2020.

Brọda Petrosov ọ ta nọ: “Evaọ okenọ mẹ jọ uwou-odi na, edẹ jọ e jariẹ nọ eva e jẹ hae nwane were omẹ tere he. Rekọ Jihova ọ jẹ rehọ Ebaibol na rọ sasa omẹ oma. Mẹ jẹ hae lẹ se Jihova keme mẹ riẹ nọ ọ riẹ epanọ eware e rrọ omẹ oma, yọ ọ gwọlọ nọ ọ rẹ sasa omẹ oma. Eria Ebaibol buobu i fiobọhọ kẹ omẹ gaga, rekọ oria jọ nọ o rẹ thọrọ omẹ ẹro ho họ, obe Ahwo Filipai 4:13.”

A yẹ Brọda Petrosov evaọ ẹwho Ashgabat nọ ọ rrọ okpẹwho esuo Turkmenistan. Nọ ọ jẹ whẹro ze, o wuhrẹ epanọ a re kporo agita ziezi. O rẹ were iẹe re o kere ile, fa ebọro, gadiẹ igbehru, jẹ ya ame evaọ ewa nọ e rrọ okegbe rai.

Ibe ọmọ-isukulu riẹ nọ a gbẹ rrọ eklase nọ ọ rrọ Osẹri Jihova ọye o wuhrẹ i rie Ebaibol na, yọ ọ họ-ame evaọ ukpe 2019. Dede nọ ohwo uviuwou David ovuovo ọ rrọ Osẹri Jihova ha, a bi kpokpo iei fiki egagọ nọ ọ rrọ họ.

Nọ David ọ nwane họ-ame no, o raha oke he a tẹ rehọ iẹe kpohọ ekọto fikinọ ọ rọwo nọ o re fi odẹ hotọ kẹ iruo isoja ha. Evaọ Turkmenistan, a rẹ kuvẹ hẹ re ohwo o ru iruo efa ro nwene iruo isoja nọ ọ hae ti ru. Fiki onana, a te bruoziẹ kpei inọ ọ rẹ rria uwou-odi evaọ ukpe ọvo.

Jihova o fiobọhọ kẹ Brọda Petrosov gaga evaọ ukpe ọvo nọ ọ rria uwou-odi na. Ọ ta nọ: “Evaọ okenọ mẹ jọ uwou-odi na, oni mẹ ọ jẹ hae vi uyere inievo ukoko na se omẹ, enọ o rrọ bẹbẹ kẹ re a nyaze te ruẹ omẹ. Oni mẹ ọ tẹ jẹ ta nọ inievo ukoko na a be hae lẹ roro omẹ ẹsikpobi. Onana u ru eva were omẹ gaga.”

David ọ riẹ nọ wọhọ epanọ uzi orẹwho Turkmenistan o ta, a sae wariẹ ta kẹe nọ o fi odẹ hotọ rọkẹ iruo isoja. A te gine ru lele uzi nana, a te wariẹ brukpei je fi iei họ uwou-odi kri vrẹ epaọ ọsosuọ.

David ọ ta nọ: “Ohwo ọvo nọ ọ gwọlọ nọ a re fi ei họ uwou-odi ọ rrọ họ, yọ mẹ gwọlọ wariẹ zihe kpohọ uwou-odi hi. Rekọ ozọ u bi mu omẹ hẹ. Ẹrọwọ nọ me fihọ Jihova, uduotahawọ nọ inievo na a be kẹ omẹ, gbe ile ukoko na nọ mẹ be gaviezọ kẹ, i bi fiobọhọ kẹ omẹ wo udu.”

Ma riẹ nọ Jihova o ti gbe fiobọhọ kẹ David re o kru ẹrọwọ riẹ je wo udu. Ma be jẹ lẹ roro inievo-emezae ikpe mai nọ e gbẹ rrọ uwou-odi fikinọ a rọwo nọ a re ru iruo isoja ha. Ma riẹ nọ Jihova o you rai, ọ be kareghẹhọ ae, yọ o bi fiobọhọ kẹ ae.​—Olezi 69:33.