Evaọ Aria 6, 2020, okọto jọ evaọ obọ Turkmenistan u bruoziẹ inọ a fi Brọda Eldor Saburov avọ Sanjarbek oniọvo riẹ họ uwou-odi ikpe ivẹ keme a rọwo nọ a rẹ jọ isoja ha fiki oware nọ a wuhrẹ evaọ Ebaibol. Eldor ọ rrọ ikpe udhegbọvo, Sanjarbek kọ ikpe udhegbisoi. Okọto na o rọwo nọ inievo na a wariẹ tu ẹdhọ na ha. Onana họ orọ avọ isiava nọ a bruoziẹ kpe ai na, fikinọ a gwọlọ jọ abọ ọvuọvo ho evaọ isuẹsu.

Ukpe 2016 a rọ kaki se Brọda Sanjarbek Saburov kẹ iruo isoja, rekọ ọ rọ unu kpotọ vuẹ ae nọ ọ sae jọ isoja ha. A tẹ rehọ iẹe guẹdhọ je bruoziẹ inọ a be kẹe ikpe ivẹ nọ egọmeti o re ro fiẹrohọ iẹe.

Ukpe nọ u lele i rie, nọ a se Sanjarbek oniọvo ọmaha riẹ kẹ iruo isoja, ọ tẹ jẹ se. A te bruoziẹ inọ jọ a kẹe iruo nọ e rẹ sae lẹliẹe ku iroro rẹriẹ. Ikpe ivẹ a ta nọ o re ru iruo na, yọ a tẹ ghale osa riẹ kpohọ abasoi, egọmeti ọ vẹ hae rehọ abọvo.

Uzi Turkmenistan o ta nọ ohwo ọ tẹ siọ iruo isoja ọrọ avọ isiava, a rẹ sae wariẹ rọ ohwo na guẹdhọ evaọ okọto a ve bruoziẹ kpei je fi ei họ uwou-odi. Fikiere evaọ Ane 2020 nọ a wariẹ se inievo ivẹ na inọ a nyaze re a fi ai họ isoja, nọ a jẹ se, a te si obe kẹ ae. Kẹsena a tẹ rehọ ae guẹdhọ, bruoziẹ kpe ai je fi ai họ uwou-odi.

Uwou-odi nọ a fi inievo na họ na o te kẹ ọsẹgboni rai uye gaga. U te no ere no, o te lẹliẹ akpọ bẹ ae gaga. Ọsẹ na ọ be sai kpohọ iruo tere he fiki uke nọ o be dae gaga. Emezae ivẹ riẹ na ae a be kuọ uwou na. Ivovo a rẹ kọ, oye họ okọ rai. Kọ ẹvẹ uzuazọ ọsẹgboni na o te jọ obọnana nọ a fi emezae rai họ uwou-odi no na? Ukpenọ emọ na a rẹ rẹrote ọsẹgboni na, kọ ọsẹgboni na họ enọ e te hae kpalọ oma rẹrote emọ rai nọ e rrọ uwou-odi.

Evaọ obọ Turkmenistan, nọ ohwo ọ tẹ siọ iruo isoja, u wo iruo efa nọ egọmeti o fihọ họ nọ a rẹ kẹ ohwo na. Fikiere, izoge nọ e rrọ Isẹri Jihova nọ a rọwo nọ a rẹ jọ isoja ha fiki oware nọ a wuhrẹ evaọ Ebaibol, a re fi ai họ uwou-odi. A re fi ai họ uwou-odi te ukpe ọvo hayo tube te ikpe ene dede. Inievo-emezae ikpe mai eye e rrọ uwou-odi obọnana evaọ Turkmenistan nọ a te kele inievo ivẹ nana kugbe ai. A fi rai họ uwou-odi fikinọ a rọwo nọ a rẹ jọ isoja ha.

Ma riẹ nọ Jihova o ti fiobọhọ kẹ izoge mai obọ Turkmenistan nọ i bi kru ẹrọwọ rai na. Jọ a hae kareghẹhọ ẹme nọ Jihova ọ ta kẹ Asa ovie na avọ ahwo riẹ, inọ: “Wha kru oma ga, udu u no owhai awọ họ, keme a te hwosa iruẹru rai kẹ owhai.”—2 Iruẹru-Ivie 15:7.