Evaọ Edene-Oka, Akpegbivẹ 17, 2020, okọto nọ a re se European Court of Human Rights (ECHR) o bruoziẹ kẹ Brọda Oleksandr Tretiak inọ ọ rease evaọ ẹdhọ Tretiak avọ Ukraine. Evaọ Akpegbọvo 26, 2013, nọ Brọda Tretiak o je no usi uwoma ota ze, imasa jọ a te kpei ukpe igbabọ evaọ edhere. Okọto ECHR na o bruoziẹ kpe egọmeti Ukraine inọ a romatotọ kiẹ ẹme na ziezi hi. Okọto na o ta nọ egọmeti Ukraine ọ hwa igho nọ i bu te 7,500 euros (₦3,526,614) kẹ oniọvo mai na.

A kpe Brọda Tretiak gaga te epanọ ọ rrọ jọ ẹsipito enwenọ amara soso. Ahwo iporisi a nyae kiẹ oria nọ oware na o jọ via na ha bẹsenọ emerae esa e rọ vrẹ. U te no ere no, a rọwo nọ fikinọ Brọda Tretiak yọ Osẹri Jihova a ro kpei na ha, gbe nọ ọ nwoma gaga gbe he. Uwhremu na, ahwo iporisi na a tẹ vẹ ẹme na tu inọ uzi nọ ahwo na a thọ u te oware ovo ho. Yọ evaọ usu imasa nọ i kpe Brọda Tretiak na, omọvo ọvo a ta nọ ọ thọ uzi, rekọ okenọ a rọ ta ere na yọ ohwo na ọ dhẹ no orẹwho na no. Ahwo iporisi na a tẹ jẹ ta nọ imava nọ i kiọkọ na isisẹri gheghe a rrọ evaọ ẹme na. Yọ ọjọ evaọ usu imava nana iporisi. A mu rai hi yọ a kẹ rai uye gbe he. Uruemu okienyẹ nana gbe eware efa nọ a ru eye i ru nọ Brọda Tretiak o ro tu ẹdhọ na se okọto ECHR evaọ 2015 na.

Evaọ oziẹ nọ okọto ECHR o bru na, okọto na o ta nọ “ahwo egọmeti [Ukraine] a romatotọ kiẹ oware nọ a ru Oleksandr Tretiak na riwi hi,” yọ onana o wọso uzi European Convention on Human Rights.

Ma rẹro nọ oziẹ nana u ti ru nọ inievo-emezae gbe erọ emetẹ mai nọ e rrọ Ukraine gbe erẹwho efa a te sae rọ ruabọhọ egagọ rai ababọ ukpokpoma. Maero na, ma yere Jihova, ọnọ o bi bru uvioziẹ kẹ omai.​—Enuobro 3:59.