Evaọ Azie 26, 2018, okọto ahwo “Donetsk People’s Republic” (DPR) nọ a re se Supreme Court o whowho nọ egagọ Isẹri Jihova yọ “ahwo nọ a re ru ozighi re ahwo a kpare so egọmeti.” Fikiere, a te fi awhaha họ iruo mai. Ọnọ o wuzou ẹme-ofihọ okọto evaọ orẹwho na nọ ọ wọ eku na họ omai uzou na gbe okọto na a lele Isẹri Jihova ọvuọvo ta ẹme he, evaọ okenọ a je ro gu ẹdhọ na. Oghẹrẹ nọ a bi ro kpokpo Isẹri Jihova evaọ orẹwho na u bi dhe eyeyoma, yọ awhaha nana nọ a fihọ iruo mai na họ edhere ọkpokpọ nọ a bi ro kpokpo Isẹri Jihova evaọ orẹwho na.

No anwọ udevie 2017 ze nọ okọto DPR nọ a re se Supreme Court o ro whowho nọ ebe mai jọ yọ ebe “ahwo nọ a re ru ozighi re ahwo a kpare so egọmeti” na, oghẹrẹ nọ a bi ru inievo mai nọ e rrọ ekwotọ jọ evaọ Donetsk gbe Luhansk, nọ e rrọ ofẹ ovatha-ọre Ukraine, u yoma vi epaọ ọsosuọ no. Evaọ ukpe yena, iporisi a nọ Isẹri Jihova nọ i bu te udhoree-gbikpe (170) enọ no. Ahwo egọmeti nọ e rrọ ibrotọ yena a be rọ ogaga gboro Egwa Uvie mai unọjọ utọjọ. Rite Aria 29, 2018, Egwa Uvie ikpegbezeza a gboro rehọ no.

Ghelọ ukpokpoma nọ u bi te inievo-emezae gbe erọ emetẹ mai nọ e rrọ ekwotọ nana, a fievahọ Jihova, ‘Ọghẹnẹ esiwo’ na.—Olezi 18:46.