Evaọ ukpe 1935, a bọ Ọgwa Uvie jọ fihọ oria jọ nọ a re se 1228 Pensacola Street, Honolulu, evaọ obọ Hawaii. Okenọ a jẹ bọ Ọgwa Uvie nana, yọ Brọda Joseph F. Rutherford nọ ọ jọ prẹsidẹnte Watch Tower Society ọ gbẹ rrọ akpọ. Uwou yena họ uwou ọsosuọ nọ a se Ọgwa Uvie evaọ akpọ na soso. Ọgwa Uvie nana o te zihe ruọ oria nọ ahwo buobu a be jẹ gọ Jihova. Yọ u te ikpe udhone-gbisoi no, nọ a be rọ jọ Ọgwa Uvie na ru ewuhrẹ. Ikoko ene e rrọ Ọgwa Uvie na ru ewuhrẹ, yọ ẹvẹrẹ jọ nọ a bi ro ru ewuhrẹ evaọ etẹe họ Hawaii Pidgin. a

Taure ẹyao COVID-19 na o te ti du lawhe, nọ a wariẹ bọ Ọgwa Uvie na oghẹrẹ ofa je ru ei wo erru vi epanọ ọ jọ no, inievo na a te zizie ahwo ẹwho na, ahwo egọmeti, gbe otu iwuhrẹ ze ti rri ughe eware sa-sa nọ e rrọ Ọgwa Uvie na no ẹdẹ avọ 11 rite 15 Ava, 2020. Inievo na a rehọ ahwo nọ a nyaze na nya Ọgwa Uvie na wariẹ, yọ ahwo na a ruẹ iwoho sa-sa nọ i bi dhesẹ eware oke anwae, a tẹ jẹ gaviezọ kẹ eme nọ inievo na a ru nọ a jọ ta kpahe iruẹru Isẹri Jihova evaọ oke mai na. Kẹsena evaọ ẹdẹ avọ 16 Ava, Brọda David H. Splane nọ ọ rrọ Utu Ẹruorote Iruẹru Isẹri Jihova, ọ tẹ kẹ ovuẹ nọ a rọ rehọ Ọgwa Uvie na mudhe.

Oniọvo-ọmọtẹ jọ nọ ọ jọ usu ahwo nọ a jẹ ruẹrẹ eware họ kẹ ẹdẹ nọ a te rọ rehọ Ọgwa Uvie na mudhe na ọ ta nọ: “Orọnikọ ma zizie ahwo na ze re ma ta usi uwoma kẹ ai hi, rekọ ahwo na a rọ uvẹ yena riẹ kpahe omai ziezi, keme o sae jọ nọ ibuobu rai a re nwane riẹ kpahe Isẹri Jihova vẹre he.”

Eware nọ a dhesẹ evaọ ẹdẹ yena u ru nọ inievo na a rọ riẹ ikuigbe Isẹri Jihova nọ e rrọ ikoliko Hawaii ziezi. Yọ a ruẹ nọ ẹme Ebaibol nana u bi gine rugba inọ, “A te kẹ odẹ Jihova Ọghẹnẹ Izrẹl orro evaọ ikoliko abade na.”—Aizaya 24:15.