Evaọ Ọvo 2019, a ru ọruẹrẹfihotọ nọ a rẹ rọ rehọ Ẹvẹrẹ Obọ rọ t’Ẹme America (ASL) dhesẹ eware kẹ ahwo nọ a ziọ ugheriwo evaọ oria nọ eware anwae e rẹ jọ evaọ obọ ehri ukoko. Brọda Enrique Ford nọ ọ be rẹrote Ẹko-Iruo Oria nọ Eware Anwae E rẹ Jọ ọ ta nọ: “Re a sae fa odhesẹvia eware anwae nọ e rrọ oria yena fihọ ẹvẹrẹ ASL je ru ai fihọ ividio, okolo iruo ho! Enẹna, ahwo nọ a diezọ gbe enọ i re yo ẹme tere he a rẹ sai wo otoriẹ eware nọ e rrọ oria yena vevẹ.”

Oniọvo jọ nọ a re se Ana Barrios nọ o diezọ, ọ tẹ jẹ rrọ ọkobaro oke-kpobi evaọ New York, ọ jọ usu ahwo ọsosuọ nọ a rri ividio ASL na okenọ a kpohọ ugheriwo. Ọ ta nọ: “Eva e were omẹ gaga nọ me rri ividio na evaọ ASL! Dede nọ me kpohọ ugheriwo evaọ etẹe no ẹdẹjọ yọ me se eware nọ a rọ Oyibo kere fihọ iẹe no, i duobọte omẹ udu hu keme mẹ nwani wo otoriẹ rai tere he. Nọ me rri ividio jọ no evaọ ASL, me te ti wo otoriẹ odẹ Jihova vi epanọ me wo otoriẹ riẹ anwẹdẹ vẹre. Ividio na i dhesẹ iruemu Jihova jọ nọ i duobọte omẹ udu gaga te epanọ irui-oviẹ i ro su no omẹ aro ze!”

Amara Azeza 2017 a ro mu evuẹ nọ e rrọ oria nọ eware anwae e rẹ jọ na họ ẹfa fihọ ASL. Inievo 23 i fiobọhọ evaọ efafa na; ezeza evaọ usu rai i diezọ, yọ ezeza efa yọ inievo nọ esẹgbini rai i diezọ. Utu efafa na a ru ividio nọ i bu te egba izii (900), yọ aikpobi i theri te euwa izii wọhọ epanọ enọ a rọ unu rekọdo i theri te. Istudio esa a jọ rekọdo ividio na. Eye họ: istudio nọ ọ rrọ ọfisi efafa evaọ Fort Lauderdale, Florida; ọnọ ọ rrọ uwou ogha Wallkill, New York evaọ America; gbe ọnọ ọ rrọ obọ ehri ukoko evaọ Warwick, New York. Taure a te ti siobọno ividio ASL na, a ru ọruẹrẹfihotọ nọ inievo nọ i diezọ nọ e rrọ unuikpe sa-sa, je no eria sa-sa ze a ro rri ividio na, onọ u fiobọhọ kẹ efefafa na ru efafa na woma viere.

Ẹko-Iruo Oria nọ Eware Anwae E rẹ Jọ a dẹ ekwakwa nọ a re ro rri ividio ASL nọ i re dhesẹ eware nọ e rrọ oria ugheriwo na wọhọ epanọ enọ a rọ unu rekọdo na i dhesẹ i rai. Ẹko-Iruo nana a te je ru ekpẹti ughe 14 nọ e jọ eria ugheriwo na no vẹre fihọ epanọ e sai ro dhesẹ ividio ASL.

Brọda Mark Sanderson nọ ọ rrọ omọvo Utu Ẹruorote Iruẹru Isẹri Jihova ọ ta nọ: “Ẹjiroro nọ a ro ru oria nọ eware anwae e rrọ na fihọ Warwick họ, re o tuduhọ ahwo nọ a bi weze ziọ ehri ukoko na awọ jẹ bọ ẹrọwọ rai ga. Eva e were omai gaga inọ evẹrẹ nọ a bi ro dhesẹ eware nọ e rrọ oria nana i bu te 14; onọ u kugbe ASL rọkẹ ahwo nọ a diezọ gbe enọ i re yo ẹme tere he, te inievo mai gbe amọfa nọ a bi weze ze.”

Anwọ oke nọ a ro rovie ehri ukoko mai nọ ọ rrọ Warwick na, ahwo nọ a ziọ ugheriwo no a bu vrẹ idu egba isoi (500,000). Ma bi zizie inievo mai nọ e rrọ akpọ na soso re a nyaze te rọ ibiaro rai ruẹ eware nọ e rrọ oria eware anwae na je wuhrẹ eware buobu kpahe ikuigbe Isẹri Jihova. Inievo nọ e sae nyaze a ti wo ọbọga nọ a te rọ ruabọhọ “fievahọ Ọghẹnẹ.”—Olezi 78:7.