Evaọ Ane 7, a jọ ẹwho Palm Beach, evaọ Florida dhesẹ ividio ovuẹ Ekareghẹhọ na evaọ iwou-odi ivẹ jọ, yọ ahwo uwou-odi nọ a bu vi odu ọvo gbe ẹgba ọvo (1,100) a gaviezọ kẹ ovuẹ na dede nọ Osẹri Jihova ọvuọvo ọ jọ kugbe ai hi.

Oniọvo jọ evaọ usu inievo-emezae ikpegbivẹ nọ i re kpohọ iwou-odi na nyae ta usi uwoma koka koka ọ ta nọ: “Oghẹrẹ nọ eware na kpobi e rọ nya kpatiẹ u gbe omai unu gaga. Yọ onana u ru omai riẹ nọ Jihova ọ ginẹ gwọlọ nọ ahwo uwou-odi na a re yo ovuẹ Ekareghẹhọ na.”

Inievo na a mi ọzae nọ o re ru iruẹru egagọ evaọ uwou-odi na uvẹ no vẹre re a sae jọ iwou-odi ivẹ na kẹ ovuẹ Ekareghẹhọ na. Rekọ nọ ẹyao COVID-19 na o je kie ze, omaa yena o gbẹ gbabọ họ. Inievo na a tẹ be gwọlọ edhere ọfa nọ a rẹ rọ kẹ ovuẹ na evaọ iwou-odi na. Rekọ taure a tẹ te ruẹ edhere ọfa, ọzae na ọ tẹ yare ae oware jọ nọ a rẹro riẹ hẹ, inọ otẹrọnọ a wo ividio ovuẹ Ekareghẹhọ na nọ a rekọdo no vẹre, jọ a vi ei sei re o dhesẹ iẹe kẹ ahwo na. Kpakiyọ oke nana kpobi yọ ọye ọvo ọ rehọ iroro obọriẹ ru ọruẹrẹfihotọ epanọ o ti ro dhesẹ ividio na kẹ ahwo uwou-odi na no.

Inievo na a te bi ru epanọ a re ro vi ividio na gbe ebe-uzizie Ekareghẹhọ na se ọzae na re o fiobọhọ kẹ ae ghale ae. Rekọ ọzae na ọ tẹ wariẹ ru oware jọ nọ a rẹro riẹ hẹ. Kpakiyọ oke yena yọ ọye ọvo o kere eware nọ ọ tamu eria sa-sa evaọ iwou-odi na no, nọ o bi ro je ahwo uwou-odi na riẹ nọ a ti dhesẹ ividio ovuẹ Ekareghẹhọ na. Yọ evaọ ẹdẹ Ekareghẹhọ na, a kẹ ohwo kpobi evaọ iwou-odi na uvẹ nọ ọ sae rọ gaviezọ kẹ ovuẹ na.

Whaọ inievo na a fi Ebaibol jọ họ iwou-odi na vẹre inọ a ghale kẹ ahwo na. Rekọ nọ a ru Ekareghẹhọ na no, ọzae na o te se inievo na inọ a rehọ Ebaibol efa ze keme ọ ghale enọ a fihọ etẹe vẹre na kẹ ahwo uwou-odi na re no. Rekọ ahwo nọ a ta nọ a kẹ ae Ebaibol a bu vi unu Ebaibol nọ e jariẹ.

Eva e were omai gaga inọ, makọ ahwo nọ a rrọ uwou-odi dede a be sai yo usi uwoma Uvie na.—Matiu 24:14.