Evaọ Aria 24 rite Azie 10, 2019, ofou-ọwhibo nọ a se Dorian o fou evaọ Bahamas. Taure ofou-ọwhibo na o te ti muhọ, uwou ogha America u te mu eware họ ẹruẹrẹhọ evaọ obọ Florida. Nọ ofou-ọwhibo na ọ nwani fou vrẹ no, inievo mai nọ a wo irupre gbe ekọ-iyibo a tẹ wọ eware kpobọ Bahamas, yọ a jọ usu ahwo nọ a kake dhogbo kpobọ ukoliko na.

Inievo-emezae gbe erọ emetẹ ikpegbesa a rọ irupre wọ eware kpobọ ukoliko na te asia egba esa (300). A wọ eware nọ e gbẹdẹ te enwenọ ekpa isimeti egba esa (300), jẹ wọ inievo nọ e nyai fiobọhọ ru iruo na nọ i bu vi egba ihrẹ (700). Ofariẹ, a rọ ekọ-iyibo ikpegbesa inievo mai wọ eware nọ e gbẹdẹ te enwenọ ekpa isimeti odu ọvo gbe egba eree (1,800) kpobọ ukoliko na. O rẹ rehọ euwa 12 re a bi okọ no Florida kpobọ ukoliko na je zihe ze.

Ohwo jọ nọ a re se Jose Cabrera nọ o wuzou Palm Beach International Airport evaọ Florida nọ irupre e rẹ kpahe ọ ta nọ: “Nọ ofou-ọwhibo na o fou vrẹ no, [Isẹri Jihova] a tẹ nwane rọ irupre rai mu eware họ ẹwọ kpohọ oria nọ oware na o jẹ via na.” Ọ ta re nọ: “A re gine ru oware kpobi nọ o gwọlọ re a fiobọhọ kẹ amọfa.”

Oniọvo-ọmọzae jọ nọ a re se Glenn Sanders nọ ọ rẹ dhẹ arupre nọ ọ fialoma via kẹ iruo na ọ ta nọ: “Rọkẹ omai inievo na buobu, onana họ orọ ọsosuọ nọ ma rọ rehọ onaa mai fiobọhọ evaọ iruo ogbodhẹ ukoko na.” Ọ tẹ jẹ ta nọ: “Dede nọ mai yọ amabọ jọ ugboma na yọ ma te oware ovo ho, eva e were omai nọ ma sai ro fiobọhọ kẹ abọfa ugboma na nọ ọ be ruẹ uye.”—1 Ahwo Kọrint 12:26.

Uwou ogha America o ta nọ a te raha ugho nọ u bu te enwenọ ₦640,461,380 fihọ ogbodhẹ na yọ iruo na i ti kuhọ evaọ Asoi 1, 2020.