Brọda Mike Iwuchukwu o wo ọmọtẹ jọ nọ a re se Melody nọ ọ rrọ ikpe ezeza. Fiki ẹyao COVID-19 nọ ọ rrọ otọ na, itanẹte a bi jo ru isukulu enẹna evaọ obọ uwou. Ẹdẹ jọ, Brọda Iwuchukwu o te yo edo ọmọtẹ riẹ nọ o bi nwrotọ no ubruwou obehru nọ a bi jo ru isukulu na ze avọ eva nọ e be were iẹe. Ere Melody o re ru ẹsikpobi nọ oke emu uvo riẹ o te te. Oniọvo na ọ tẹ ta nọ ọ rẹ tubẹ nyai rri oware nọ ọmọtẹ riẹ o bi ru. O je roro nọ Melody ọ be re emu hayo ọ be rehọ ibebi riẹ zaharo. Rekọ oware nọ o di ọmọ na họ je ru u gbe rie unu.

Brọda Iwuchukwu ọ ta nọ: “Nọ me te etẹe mẹ tẹ ruẹ e riẹ nọ ọ keria aro ekọmputa yọ obe Eware nọ Whọ rẹ Sai Wuhrẹ Evaọ Ebaibol Na o riẹe obọ. Emọ eklase riẹ esa a be gaviezọ kẹe. Melody ọ tẹ ta kẹ omẹ nọ: ‘Dadi, me bi ru uwuhrẹ Ebaibol!’”

Anwọ Azie 2020, isukulu amọ Melody nọ ọ rrọ Houston, obọ Texas a be jọ itanẹte wuhrẹ emọ isukulu na. Anwọ oke yena ze Melody ọ be rọ daoma re o mu uwuhrẹ Ebaibol họ kugbe emọ isukulu riẹ. Ọ tẹ lẹ se Jihova, jẹ be gwọlọ oghẹrẹ nọ ọ sai ro mu ei họ.

Eva nọ e were Mike avọ Octavia, ọsẹgboni ọmọ na, a rẹ ruẹ unu gbiku riẹ hẹ. Brọda Iwuchukwu ọ ta nọ: “Ẹsikpobi Melody ọ be hae vuẹ emọ eklase riẹ kpahe Jihova. Rekọ ẹdẹ yena nọ ma ruẹ e riẹ nọ o bi ru uwuhrẹ Ebaibol, oware na u duobọte omẹ avọ oni riẹ gaga.”

Melody o gbe bi wuhrẹ emọ eklase riẹ kẹse kẹse. Ọ ta nọ: “Me wuhrẹ i rai kpahe aparadase no, me te je wuhrẹ ai kpahe Jesu no. Mẹ gwọlọ nọ a zihe ruọ Isẹri Jihova!”

Uzoge ọfa jọ evaọ obọ Illinois, United States, nọ a re se Samuel Molnar nọ ọ rrọ ikpe izii ọ be hae ta usi uwoma re.

Nọ Samuel o yo kpahe oniọvo jọ nọ ọ ta usi uwoma kẹ ohwo nọ ọ be rria kẹle ae, nọ ọ rrọ abọdekọ ogba riẹ, ọ tẹ ta nọ ọyomariẹ ọ te daoma ru ere. Nọ ọ kparo ruẹ ọmọ uruọmọ ohwo jọ nọ ọ be rria kẹle ae nọ ọ be zaharo evaọ obemu uwou ahwo na, ọ tẹ nọe sọ ọ gwọlọ yo kpahe oghẹrẹ nọ aparadase ọ te jọ. Ọmọzae na ọ tẹ ta nọ ‘Ee.’ Kẹsena Samuel ọ tẹ dhẹ nyae tọlọ Obe Ikuigbe Ebaibol Mẹ.

Samuel ọ ta nọ: “Mẹ vuẹ riẹ nọ oke o be tha nọ o ti lele erao zaharo, yọ a te nwae oma ha. Me te se iku Daniẹl nọ a fihọ ọgọdọ ikpohrokpo kẹe.”

Samuel ọ jọ ere serihọ họ. O kere ileta se ọmọ na, nọ ọ jọ fodẹ oghoghẹrẹ eware nọ ma wo evaọ jw.org, te ividio nọ e riẹe. Ọ tẹ jẹ ta kẹ ọmọ na nọ o ti se iku Ebaibol ọfa kẹe nọ avọ iẹe a tẹ ruẹ ẹro ẹdẹfa.

Eva e were Samuel gaga. Yọ u wo oware ofa nọ ọ gwọlọ ru. Ọ ta nọ: “Mẹ gwọlọ riẹ emebe-evẹvẹ kpobi nọ e rrọ Ẹkpẹti Ekwakwa Ewuhrẹ na, re mẹ sae rehọ ae ta usi uwoma kẹ ahwo.”

Inievo-emetẹ esa jọ evaọ Houston nọ e rrọ izoge a ma omaa jọ. A ta nọ a re ru ọkobaro obufihọ evaọ oke ehọlide, yọ ere a gine ru kẹle na.

Inievo-emetẹ esa na họ Joselyn Horta nọ ọ rrọ ikpe ikpegbesa; Melanie Alvarez nọ ọ rrọ ikpe ikpegbivẹ; gbe Chloe Rodriguez nọ ọ rrọ ikpe ikpe. Evaọ amara Aria, aimasa na a jẹ hae rọ ekọmputa thuru kugbe ohwohwo re a kere ileta rọ ta usi uwoma. A jẹ hai ru ere te isiasoi koka koka, yọ ẹsibuobu ighọjọ ihrẹ irioke yọ a muhọ no.

Joselyn ọ ta nọ: “Ma re gbiku jẹ re emu oke ovona. Kẹsena nọ ighọjọ ihrẹ gbe abọ e jẹ nwani te no, ma ve mu ileta họ ekere.” Ẹsejọ ọjọ evaọ usu aimasa na ọ rẹ wezẹ ruọ oghẹ. Kẹsena imava nọ i kiọkọ a ve vi uwou emiehwẹ sei inọ: “Ẹvẹ yo? Kpama! Oke usi uwoma u te no!”

Oware nana nọ emetẹ esa nana a bi ru na u bi fi ajọwha usi uwoma họ ae oma gaga. Yọ orọnikọ ae ọvo ho, te egbẹnyusu rai gbe ahwo uviuwou rai. Alicia, oni Joselyn ọ ta nọ: “Ẹsejọ mẹ rẹ ta nọ mẹ te sai kpohọ usi uwoma ha, rekọ nọ mẹ jẹ ruẹ Joselyn nọ o mu usi uwoma họ no, mẹ vẹ ta nọ, ‘Mẹ rẹ wọ owọ usi uwoma re!’”

Eva e be were Jihova gaga nọ ọ be ruẹ ighele nana nọ a be ta usi uwoma na avọ ajọwha evaọ oke nana nọ ẹyao ọgaga nọ o re vo ọ rrọ otọ na.​—Itẹ 27:11.