Fiki okpẹyao COVID-19 na nọ o du lahwe, ma siọ ikokohọ ba eru evaọ Egwa Ikokohọ evaọ Asa 2020. Evaọ ukpe nana, a ti ru okokohọ ologbo nọ uzoẹme riẹ o rrọ “Wo Odiri”! na nọ i bu te idu ezeza (6,000), evaọ evẹrẹ nọ i bu vi egba isoi (500). A ru okokohọ ologbo ọsosuọ evaọ edẹ 12 rite 14 amara Asoi, 2023.

Ahwo nọ a kpohọ okokohọ na evaọ Ọgwa Okokohọ Isẹri Jihova nọ ọ rrọ Newburgh evaọ New York, U.S.A., a bu vi odu ọvo gbe egba eree (1,800). Oniọvo-ọmọtẹ jọ nọ a re se Khrystine Torres o kpohọ okokohọ na. Ọ ta nọ: “Nọ ohwo-agbara okokohọ na ọ ta nọ: ‘Ma dede owhai rehọ,’ ahwo kpobi nọ a jọ okokohọ na a tẹ nwani mu abọ họ ẹtehe. Eva e jẹ were ohwo kpobi inọ ma sai kokohọ oria ovo.” Brọda Duane Smith nọ o kpohọ okokohọ na re ọ ta nọ: “A rẹ ruẹ unu gbiku oghọghọ riẹ hẹ. Whọ rẹ nwane ruẹ nọ eva e be were inievo na kpobi inọ a rrọ kugbe.”

Onana họ orọ ọsosuọ nọ oniọvo-ọmọtẹ jọ nọ a re se Jessica Dolcemascolo nọ ọ họ-ame evaọ etoke okpẹyao COVID-19 na, o ro kpohọ okokohọ ologbo nọ ahwo a jọ kokohọ enẹ. Ọ ta kpahe okokohọ na inọ: “Nọ mẹ ruẹ epanọ inievo na a jẹ ghọghọ, wereva, je dhesẹ uyoyou kẹ ohwohwo te, o jọ omẹ oma wọhọ ẹsenọ mẹ ruẹ ogbẹnyusu ọkpekpe mẹ jọ nọ mẹ ruẹ kri no.” Oniọvo-ọmọtẹ jọ nọ a re se Noemi Tinajero nọ ọ rrọ ikpe ikpegberee, nọ ọ họ-ame evaọ ubrobọ emuhọ ukpe nana ọ ta nọ: “Whọ rẹ ruẹ inievo gbe iviuwou nọ eva e be were. . . . O wọhọ ẹsenọ ma rrọ obọ akpọ ọkpokpọ na no.”

Ahwo buobu a ta kpahe epanọ uzoẹme okokohọ na o were rai te. Oniọvo-ọmọzae jọ nọ a re se Sam Huh ọ ta nọ: “O rrọ bẹbẹ kẹ omai ahwo buobu re ma wo odiri. Fikiere u woma inọ a jọ okokohọ na ta kpahe epanọ u wuzou te re ma rọ aro kele Jihova dhesẹ odiri.” Oniọvo-ọmọtẹ jọ nọ a re se Frenchie Smith ọ ta nọ: “Mẹ jọ okokohọ na wuhrẹ nọ o roja re me wo odiri evaọ oware kpobi nọ me bi ru evaọ uzuazọ. Eware kpobi nọ a ta kpahe evaọ okokohọ na i wo iruo kẹ omai.”

Okokohọ ọsosuọ nana nọ a ru evaọ okpẹwho Newburgh evaọ New York na, o tuduhọ ohwo kpobi nọ o kpohọ okokohọ na awọ gaga! Mai kpobi, te ima ahwo buobu efa evaọ akpọ na soso, ma bi rẹro oke nọ ma ti ro kpohọ okokohọ na evaọ emerae nọ e be tha na. Ma ti wo erere no eware nọ a ti wuhrẹ omai evaọ Ebaibol na ze.—Olezi 122:1.