Evaọ oka Azie 16, 2019, okposo ọgaga nọ a se Imelda ọ rrọ gaga evaọ ofẹ Texas jọ. Evaọ emedẹ jọ ọvo nọ oso na ọ rọ rrọ na, owhe o te ku eria buobu evaọ Texas. Ahwo jọ a ta nọ okposo nana nọ ọ rrọ na họ ọnọ ọ mae rro kpaobọ nọ ọ rrọ no evaọ United States. Nọ oso na ọ rrọ ka no, whọ rẹ ruẹ imoto buobu nọ ahwo a nyaseba edhere fiki oso na. Ahwo buobu a tẹ jẹ kwa no iwou rai.

Iyẹrẹ nọ e kaki no Uwou Ogha United States te omai obọ i dhesẹ nọ inievo 29,649 mai nọ e be rria oria nọ oware na o jọ via na, ọvuọvo ọ nwoma hayo whu hu. Rekọ, iwhowho-uvie 114 a dhẹ no iwou rai. U te no ere no, iwou 145 erọ inievo mai e raha gaga. Egwa Uvie ikpe e tẹ jẹ raha re.

Uwou Ogha na o rehọ Ogbẹgwae Obufihọ kẹ Ahwo nọ Eware Okpẹtu E Via Kẹ ro mu no, yọ a bi ruiruo kugbe esẹro okogho gbe ekpako ukoko nọ e rrọ oria na re a kiẹ oghẹrẹ nọ oso na ọ raha eware te riwi je fiobọhọ kẹ inievo mai wo eware nọ a gwọlọ. Ma riẹ nọ Jihova o ti fiobọhọ kẹ inievo ma na, keme “uyoyou [riẹ] nọ o rẹ hiẹ hẹ u kpehru te obọ idhiwu na.”—Olezi 36:5.