Evaọ Akpe 10, 2018, ofou-ọwhibo nọ a se Michael o fou ruọ Florida, onọ o raha eware gaga evaọ ofẹ obọze ovatha-ọre United States. A ta nọ oghẹrẹ ofou-ọwhibo nana ọ rọ usu ifou-ọwhibo nọ e mae ga nọ i fou ruọ United States no, yọ ọ raha eware gaga. Ofou-ọwhibo na o te je kpe enwene ahwo ikpegberee.

Inievo-emezae gbe erọ emetẹ mai nọ e rrọ ikoko udhone gbe ikpegbene gbe ikogho ikpegbesa e rrọ eria nọ ofou-ọwhibo na o jo fou na. Oniọvo mai ọvuọvo o whu hu, rekọ inievo esa e nwoma. Ofou na ọ raha iwou inievo mai nọ i bu te egba isoi gbe udhegberee (528) gbe Egwa Uvie ọgbagbene, yọ ikpẹ Egwa Uvie ọgbagbizii e raha.

Uwou ogha mai nọ ọ rrọ United States gbe Ogbẹgwae Obufihọ kẹ Ahwo nọ Eware Okpẹtu E Via Kẹ, avọ esẹro okogho nọ i bu vi udhuvẹ a bi ru iruo kugbe re a fiobọhọ kẹ inievo mai na. Iruo jọ nọ a bi ru ro fiobọhọ kẹ inievo mai na họ, emu nọ a rẹ re nọ a bi ru te inievo mai na obọ, a bi fiobọhọ kẹ enọ e gwọlọ usiwo imu, eria nọ a rẹ rria, gbe ame. Inievo na a bi je ru iwou nọ e raha fo re a sae rria ae, a be rọ ame wozẹ idhe iwou na, a be kwa ire nọ i kie fihọ otọ no, jẹ be ruẹrẹ eria nọ e raha. U te no ere no, a ru ọruẹrẹfihotọ no re a rọ Ebaibol na tuduhọ inievo na awọ.

Dede nọ inievo mai a be rẹriẹ ovao dhe ebẹbẹ sa-sa evaọ uyero-akpọ nana, wọhọ oghẹrẹ okpẹtu nana nọ o via na, a fievahọ Jihova, Ọghẹnẹ mai na, inọ o ti fiobọhọ kẹ ae ẹsikpobi.—Olezi 142:5.