No edẹ 28 Aria rite ẹdẹ avọ 2 Azie, 2023, a thueki jọ nọ a re se Zimbabwe Agricultural Show evaọ Harare, nọ ọ rrọ Zimbabwe. Oghoghẹrẹ eware nọ a jẹ zẹ i bu vi egba isoi (500), yọ ahwo nọ a ziọ eki na a bu vi idu egba ivẹ gbe udhuvẹ gbikpe (250,000). Evaọ etoke eki na, inievo emezae gbe erọ emetẹ mai nọ e be rria okegbe na a ru oria jọ fihọ nọ a fi ebe mai họ evaọ ẹvẹrẹ Oyibo, Ndebele (Zimbabwe), gbe Shona. Iwhowho-uvie udhosa gbe ikpegbizii nọ i wobọ evaọ usi uwoma ota nana a kẹ ahwo ebe nọ i bu te enwenọ idu ezeza gbe egba esa (6,300). Ahwo ẹgba ọvo gbe ikpegbezeza (116) ae a ta nọ a gwọlọ wuhrẹ Ebaibol.

Uzoge jọ nọ a re se Tamuka o kpohọ oria ebe mai na. Oware nọ o ro kpohọ etẹe họ, ebe Questions Young People Ask—Answers That Work, Uko 1 gbe 2 na e were e riẹ gaga. Nọ ọ riẹ nọ Isẹri Jihova a re wuhrẹ Ebaibol kugbe ahwo ọvẹvẹ, eva e were riẹ wumuo ho. Ọ tẹ nọ inọ: “Kọ wha sae vuẹ omẹ eware efa kpahe Ebaibol na?” Nọ a dhesẹ epanọ ma rẹ rọ rehọ obe Reawere Uzuazọ Bẹdẹ Bẹdẹ! na wuhrẹ ahwo Ebaibol na kẹe no, ọ tẹ ta nọ ọ gwọlọ nọ a wuhrẹ iẹe Ebaibol na. Oniọvo-ọmọzae jọ nọ ọ be rria okegbe na ọ tẹ ta kẹ omọfa jọ re o wuhrẹ Tamuka Ebaibol na.

Ọzae ọfa jọ nọ o kpohọ oria ebe mai na ọ ta nọ oware jọ nọ ọ rẹ lẹliẹ eva Isẹri Jihova were iẹe họ, a wo omaurokpotọ yọ a wo ajọwha usi uwoma ota ziezi. Oniọvo-ọmọzae jọ evaọ etẹe o te se obe Matiu 28:19, 20 kẹ ọzae na, ọ tẹ ta kẹe nọ Isẹri Jihova a rri ujaje Jesu nana ghaghae, a rẹ rehọ iẹe zaro ho. Ọzae na ọ tẹ ta kẹe nọ eva e hae te were iẹe gaga orọnọ o wo udu nọ ọ rẹ rọ ta usi uwoma. Oniọvo na ọ tẹ nọe sọ ọ gwọlọ nọ a wuhrẹ iẹe Ebaibol na, yọ ọ rọwo.

Aye jọ nọ o kpohọ oria ebe mai na o yere inievo na gaga rọkẹ emamọ uruemu nọ Isẹri Jihova a re dhesẹ. Anọ a wo omarokpotọ yọ a rrọ wowou. Inievo na a tẹ ta kẹe nọ Ẹme Ọghẹnẹ nọ ma bi se je fihọ iruo evaọ uzuazọ mai oye o bi fiobọhọ kẹ omai. Kẹsena oniọvo-ọmọtẹ jọ evaọ etẹe o te dhesẹ epanọ ma rẹ rehọ obe Reawere Uzuazọ Bẹdẹ Bẹdẹ! na wuhrẹ ahwo Ebaibol na rọ kẹe. U gbe aye na unu gaga nọ ọ ruẹ ebe sa-sa evaọ oria ebe mai na nọ ma be kẹ ahwo ọvẹvẹ, te ebe nọ e rẹ sai fiobọhọ kẹ ahwo uviuwou gbe izoge. Nọ a kẹe Ebaibol gbe ebe mai jọ no, ọ tẹ ta nọ ọ gwọlọ nọ a wuhrẹ iẹe Ebaibol na. Ọ ta re nọ, “Okẹ nana họ okẹ nọ ọ mai woma kpaobọ nọ a kẹ omẹ no!”

Inievo emezae gbe erọ emetẹ mai a ta usi uwoma kẹ ahwo gaga evaọ etoke eki na. Oniọvo-ọmọzae jọ ọ ta usi uwoma kẹ aye jọ nọ ọ jẹ zẹ eware evaọ eki na. Uwhremu na evaọ ẹdẹ yena, oniọvo na o te zihe nyae kẹ aye na Ebaibol gbe ebe mai efa. Eva e were aye na gaga, fikiere o te mi ei Ebaibol gbe ebe na. Aye na ọ ta nọ anwẹdẹ ọ be gwọlọ epanọ o re ro wo Ebaibol, rekọ ọ re sai wo ho. Kẹsena ọ tẹ kẹ oniọvo na inọmba ifonu riẹ, re oniọvo-ọmọtẹ jọ ọ hae nyai wuhrẹ iẹe Ebaibol na.

Oniọvo-ọmọtẹ jọ nọ a re se Ranganai nọ o wobọ evaọ usi uwoma na ọ ta epanọ eva e were riẹ te. Ọ ta nọ: “Anwọ ukpe nukpo ze, fiki epanọ oma mẹ o gbẹ ga tere he mẹ be sae ta usi uwoma te epanọ mẹ gwọlọ họ. Rekọ oware nọ mẹ be tẹrovi họ, epanọ Jihova ọ be rọ ghale omẹ ghelọ ebẹbẹ mẹ. Ọjọ evaọ usu eghale nana họ, usi uwoma ẹgbede nana nọ me jo wobọ na. Usi uwoma na o lẹliẹ eva were omẹ gaga, yọ o tuduhọ omẹ awọ re.”

Eva e were omai rọkẹ emamọ iyẹrẹ nana. Uvẹ Ọghọ o rrọ inọ te mai te inievo emezae gbe erọ emetẹ mai evaọ Zimbabwe ma rrọ “ibe iruiruo Ọghẹnẹ.”—1 Ahwo Kọrint 3:9.