Evaọ edẹ 25 rite 29 Ane, 2023, a thueki jọ nọ a re se Zimbabwe International Trade Fair (ZITF) evaọ Bulawayo, nọ ọ rrọ Zimbabwe. Ahwo a re no erẹwho nọ i bu te udhegbivẹ ze, a re dhesẹ oghoghẹrẹ eware nọ i re si ahwo urru nọ i bu te egba isoi (500), yọ ahwo nọ a rẹ ziọ eki nana a re bu vi idu udhosa (60,000). Isẹri Jihova a rẹ ziọ eki nana, yọ ofẹ nọ a rẹ jọ wuhrẹ ahwo kpahe eware sa-sa a rẹ jọ.

Re a sai fiobọhọ kẹ ahwo nọ a no erẹwho efa ze, a fi ebe mai nọ a kere no Ebaibol ze họ oria na, evaọ evẹrẹ ikpe, te ọrọ ẹvẹrẹ Obọ rọ t’Ẹme Zimbabwe. A te je rovie uvẹ họ nọ a re ro wuhrẹ Ebaibol kugbe ahwo nọ a dhesẹ isiuru. Evaọ etoke eki na, ebe nọ a kẹ ahwo i bu vi idu ikpegbivẹ (12,000), yọ ahwo nọ a bu vi egba ene gbe udhuvẹ gbikpe (450) a fi odẹ hotọ re Isẹri Jihova a wuhrẹ Ebaibol kugbe ae. Oniọvo-ọmọtẹ jọ nọ a re se Eucebiah Mukura, nọ o je dede ahwo rehọ evaọ oria ebe mai na ọ ta nọ: “Ahwo buobu a rọwo nọ a wuhrẹ Ebaibol kugbe ae. Eva e were omẹ gaga inọ ahwo buobu a ta nọ a gwọlọ nọ Isẹri Jihova a nyai wuhrẹ ae Ebaibol na.”

A jọ oria ebe mai na dhesẹ Ebaibol Efafa Akpọ Ọkpokpọ ọrọ Ikereakere Efuafo Na. Nọ aye jọ o yo nọ ohwo jọ o je se Ebaibol na evaọ ẹvẹrẹ Ndebele, eva e were riẹ gaga keme eme nọ a rọ fa Ebaibol na i vẹ ziezi. Fikiere ọ tẹ ta nọ a kẹe ọjọ. Yọ eva e were aye ọfa jọ gaga re te epanọ o ro dhesẹ JW Library app mai nọ ọ danlodu fihọ ifonu riẹ kẹ oniọvo-ọmọtẹ mai jọ. Ọ ta kẹe nọ oware nọ ọ rọ danlodu riẹ họ, re ọyomariẹ ọ sai wo Ebaibol Efafa Akpọ Ọkpokpọ na.

Oniọvo-ọmọtẹ mai nọ a re se Gillian Ellerman nọ o je fiobọhọ kẹ ahwo nọ a jẹ ziọ oria na ọ ta nọ: “Oware nọ ọ ruẹ u gbe rie unu gaga. Oria ebe mai na ọ jẹ ka ha, ahwo a je zurie ze ọvo. Onana o wha orro se Jihova gaga!”

Eva e were omai nọ inievo mai evaọ Zimbabwe a be rọ uvẹ kpobi nọ a wo ta usi uwoma na re ahwo a wo “eriariẹ egbagba uzẹme na.”—1 Timoti 2:4.