MAJAN 4
¿Tzet xitij yuh yabʼelaxtoj tzet yal naj Matzwalil?
Xkamtoj yaʼ Adán bʼoj yaʼ Eva yuh mach syijye hebʼ yaʼ tzet yal Komam Dios (Génesis 3:6, 23)
Yabʼetoj yaʼ Eva tzet yal noʼ labʼah slonitoj yaʼ sat teʼ teʼ. Lawituʼ yaʼnipax yaʼ teʼ slobʼtoj yaʼ Adán.
Txʼoj tzet yuh hebʼ yaʼ: mule huneʼ tuʼ. Yuxin stzumbʼeltij Komam Dios yaʼ Adán bʼoj yaʼ Eva yul jardín.
Yaʼtajxa yil hebʼ yaʼ yinh sqʼinal bʼoj yuninal. Xyilanbʼitoj bʼoj xkamtoj hebʼ yaʼ. Mach satkanhoj, mach hunujxa bʼay xtokoj hebʼ yaʼ. Tonhe xtanhiloj hebʼ yaʼ.
Hebʼ yaʼ kamom pojoj chutuj hebʼ yaʼ, matxa tzet chuh yuni hebʼ yaʼ (Génesis 3:19)
Kohunil titnajonhkoj yinh yaʼ Adán bʼoj yaʼ Eva. Yuxin chonh kampaxtoj. Matxa chabʼe, matxa chilah bʼoj matxa ninoj tzetet chuh yuni hebʼ yaʼ kamom. Hakaʼ wayoj chuh hebʼ yaʼ (Juan 11:11-14).
Komam Jehová mach choche yaʼ ta xhkamtoj anma. Kawilxa yetij bʼay smeltzoʼ yaʼ sqʼinal anma xax kamtoj. Ta yijyom, chʼehojkʼoj sunilbʼal qʼinal.
