MAJAN 5
Haʼ Niman Nhabʼ: ¿maktaj xʼabʼentoj tzet yal Komam Dios?
Anma xet ehikʼoj yaʼ Noé kaw xtxʼojalxanhe chukanoj (Génesis 6:5)
Yaʼ Adán bʼoj yaʼ Eva yil hebʼ yaʼ yinh yuninal, yuxin xpochahiloj anma sat txʼotxʼ txʼotxʼ. Lawituʼ, hunqʼahanxa hebʼ naj ángeles yuh hebʼ naj hakaʼ naj Matzwalil xpakʼikoj hebʼ naj yinh Komam Dios.
Xakanoj hebʼ naj satkanh swatxʼenayoj sbʼah hebʼ naj anmahil yuh xoche hebʼ naj yiʼaʼ yixal. Kaw txʼoj yuninal hebʼ naj bʼoj qʼaʼ aytoj yip sataj yaqʼbʼilxa anma.
Xnohayoj anma txʼoj sat txʼotxʼ txʼotxʼ. Chal teʼ Biblia ta xpohiloj xtxʼojal chuh naj winaj sat txʼotxʼ txʼotxʼ bʼoj snabʼal anma xtxʼojalxanhe choche yubʼ.
Yaʼ Noé syijye yaʼ tzet yal Komam Dios bʼoj swatxʼen yaʼ huneʼ teʼ arka (Génesis 6:13, 14, 18, 19, 22)
Yal Komam Jehová tet yaʼ Noé, huneʼ winaj kʼul, ta stanhtzeʼloj Yaʼ anma txʼoj yuh huneʼ nimej nhabʼ.
Yal yaʼ tet yaʼ ta swatxʼe yaʼ huneʼ teʼ hukubʼ kaw nimejal chuh yah yibʼanh haʼ haʼ: teʼ arka yet yaʼ Noé. Yilal yaniktoj yaʼ yet yaman nhahil bʼoj sunil smajanil noʼ noqʼ yul teʼ.
Yaʼ Noé yal yaʼ tet yaqʼbʼilxa anma ta chuluj huneʼ niman nhabʼ. Yajaʼ mach xʼabʼelaxtoj tzet yal yaʼ. Ay mak tonhe xtzebʼi bʼoj ay mak kaw xtit showal.
Yet xlawi swatxʼen yaʼ Noé teʼ arka, yaktoj yaʼ hej noʼ noqʼ yul teʼ.
