Wi Bredaz an Sistaz:

Tingk bout dis: yu a did wan a di apasl dem we de pan Mount Aliv an Jiizas kom kom taak tu unu. An dis az im did a go bak a evn im se: “Di uoli spirit a-go kom pan unu an ful unu op wid powa an unu wi tel piipl iina Jeruusilem, Judiya, Samieriya an aal uova di worl bout mi.” (Aks 1:8) Wa yu wuda du?

Yu mait-a wuda fiil se dis a sitn we yu kuda neva eva du. Yu guda aal staat tingk se, ‘Bot no dis likl bit a piipl a fala Jiizas? Ou wi fi go mek piipl “aal uova di worl” nuo bout im?’ An yu mait-a aal did tingk bout wa Jiizas did se di nait bifuo im ded. Im se: “No sorvant no biga dan im maasta. Ef dem mek mi sofa den dem mos a-go mek unu sofa tu. Ef dem du wa mi tiich dem fi du, dem a-go du wa unu tiich dem fi du tu. Bot dem a-go du aal a dem sitn ya tu unu chuu unu a fi mi, an kaa dem no nuo di wan we sen mi kom ya.” (Jan 15:20, 21) Wen yu tingk bout wa Jiizas did se, yu mait-a a aks yuself da kwestiyan ya, ‘Ef piipl a-go a fait gens mi kaaz a wa mi biliiv, ou mi kyan go elp piipl fi riili andastan wa Gad Wod se?’

Kaa wi a Jeuova Witnis, it miin se wi afi wok aad fi priich tu piipl “evriwe,” an wi afi dwi’it “aal uova di worl.” (Mat. 28:19, 20) So wi mait-a fain se wi a aks di siem kain-a kwestiyan dem we dem did a aks dem taim de. So sins wi did don nuo se piipl a-go fait gens wi, ou wi kyan gwaan du da wok ya?

Di buk we niem Aks mek wi nuo ou Jeuova did elp di apasl dem an di ada Kristiyan dem we did de bout dem taim de fi du som big tingz so dat dem kuda gwaan priich tu piipl an tiich dem. Da buk ya we yu a riid nou a-go elp yu fi nuo muor bout wa did gwaan, an it a-go elp yu fi fiil laik se yu did de de wid dem wen aal a dem big tingz de did a gwaan tu. An yu waahn nuo se yu a-go get fi si se wen it kom aan tu di wok we dem did du, nof a di tingz we di fos set a Kristiyan dem iina Baibl taim did du komiin laik di sed ting dem we Gad piipl a du tide. An yu a-go si se a no jos dat wi a du di sed kain-a wok we dem did a du, bot di wie ou wi set op sortn an sortn tingz fi du da wok de komiin laik ou dem did dwi’it tu. An wen yu tingk bout dem tingz ya, it a-go mek yu nuo fi shuor se a Jeuova a di wan we a liid im piipl dem we de pan di ort.

Wen yu a stodi di buk we niem Aks, wi riili uop se it wi elp yu fi nuo fi shuor se Jeuova a-go aalwiez de de fi yu. An wi prie se aal a di sitn dem we yu lorn wi mek yu nuo se Jeuova a-go yuuz im uoli spirit fi elp yu fi tan op chrang. An wi uop se di sitn dem we yu lorn wi push yu fi gwaan ‘elp piipl fi andastan di mesij bout Gad Kindom’ so dat dem kyan get di chaans fi liv fi eva.​—Aks 28:23; 1 Tim. 4:16.