Gad waahn evribadi fi prie tu im an get kluos tu im. (Psalm 65:2) Bot a no evri prieya im lisn tu ar fiil pliiz wid. Fi egzampl, Gad mait no lisn tu di prieya a wan man we a chriit im waif bad. (1 Piita 3:7) An wen di Izrelait dem wudn tap du we bad, Gad neva lisn tu dem prieya non at aal. So wi kyan si se prieya a wan speshal blesn fram Gad. Alduo dat a di kies, piipl we komit som siiros sin, ef dem shuo se dem sari fi di rang we dem du an tap dwi’it, Gad wi lisn tu dem prieya.​—Riid Isaiah 1:15; Aks 3:19.

Wach da vidiyo ya Yu Tingk Gad Lisn tu Evri Prieya?

Prieya a paat a wi worship. Dats wai wi fi onggl prie tu wi Kriyieta, Jeuova. (Matyu 4:10; 6:9) Plos, kaa non a wi no porfek, wi fi prie iina Jiizas niem kaaz im ded fi wi sin dem. (Jan 14:6) Jeuova no waahn wi fi lorn no prieya bai aat an den se dem uova an uova agen. Im no waahn wi fi se prieya we rait dong niida. Insted, im waahn wi fi prie tu im fram wi aat.​—Riid Matyu 6:7; Filipiyan 4:6, 7.

Wi Kriyieta kyan ier wi prieya iivn ef wi jos se it iina wi main. (1 Samuel 1:12, 13) Im se wi fi prie tu im aal di taim, laik wen wi jos wiek op an wen wi a-go a wi bed, bifuo wi iit, an wen wi a-go chuu prablem.​—Riid 1 Piita 5:7; Matyu 15:36.

It no iizi fi wi get kluos tu Gad kaa wi liv mongs piipl we no chos iina im. Dem no biliiv se di piis we Gad pramis  fi di ort a-go riili kom. Dem tingk se a juok ting. (2 Timoti 3:1, 4; 2 Piita 3:3, 13) So wi niid fi kom tugeda so dat wi kyan inkorij wi wan aneda.​—Riid Iibruu 10:24, 25.

Wen wi kip kompni wid piipl uu lov Gad, it elp wi fi get kluos tu Gad. Wen wi go a di miitn we di Jeuova Witnis dem kip, wi get a chaans fi nuo piipl uu kyan elp wi fi chos iina Gad muor an muor.​—Riid Ruoman 1:11, 12.

Yu kyan get kluos tu Jeuova ef yu tek di taim fi tingk bout di ting dem we yu lorn fram im Wod. So tingk bout we im du, di gaidans we im gi, an di pramis dem we im mek. Wen wi prie an tek di taim fi tingk bout dem ting de, it wi elp wi fi tangk im fram wi aat fi ou waiz an lovin im bi.​—Riid 1 Timoti 4:15, 16.

Di onggl wie yu kyan get kluos tu Gad a ef yu av fiet ar ef yu chos iina im. Fiet komiin laik wan livin ting we yu afi fiid fi mek it gruo. Yu afi aalwiez tek taim fi tingk bout wa mek yu biliiv di sopm dem we yu biliiv iina. Wen yu du dat, a so yu wi aalwiez a fiid yu fiet.​—Riid Matyu 4:4; Iibruu 11:1, 6.

Jeuova kier bout piipl uu lov im. Im kyan protek dem fram eniting we kyan mash op dem fiet an mek dem kyaahn get fi liv fi eva. (Psalm 91:1, 2, 7-10) Im waan wi bout tingz we no gud fi wi badi an we kyan kaaz wi no fi bi api. Jeuova tiich wi di bes wie ou fi liv.​—Riid Jiemz 1:25; 4:4, 8.