LESN 13
Wa A di Gud Nyuuz Bout Rilijan?
1. A aal a di rilijan dem gud?
Iina evri rilijan yu av gud piipl we riili waahn sorv Gad. Gad si dem piipl de, an im kier bout dem. Dat a gud nyuuz. Bot, sad fi se, a uol iip a iivl tingz du iina di niem a rilijan. (2 Korintiyan 4:3, 4; 11:13-15) Azkaadn tu we wi ier iina di nyuuz, som rilijan tek paat iina waar, an som sopuot waar an ada iivl tingz we piipl du tu ada piipl. Som rilijan iivn invalv iina di abyuuz a likl pikni. Fi piipl uu lov an biliiv iina Gad, dat pien dem aat!—Riid Matyu 24:3-5, 11, 12.
Chuu rilijan mek Gad api an mek piipl av nof rispek fi im, bot im no pliiz wid faalz rilijan non at aal kaa dem tiich tingz we no iina di Baibl. Fi egzampl, dem tiich faalz dakchrin bout Gad, an dem tiich tingz bout di ded we no go so. Bot Jeuova riili waahn piipl fi nuo di chuut bout im.—Riid Ruoman 6:23; 1 Timoti 2:3-5.
2. Wa a di gud nyuuz bout rilijan?
Dem rilijan de we kliem se dem lov Gad, bot a riili Sietan worl dem lov, kyaahn fuul Gad. (Jiemz 4:4) Di Baibl mek wi nuo se “Powaful Babilan” a di niem fi aal a di faalz rilijan dem put tugeda. Wan lang lang taim ago wan siti did de bout niem Babilan, an a iina da siti de faalz rilijan did staat afta di Flod iina Nowa taim. Suun suun, bifuo dem nuo it, Gad a-go get rid a aal a di rilijan dem we a fuul op piipl an we a kip dem iina bandij.—Riid Revilieshan 17:1, 2, 5, 16, 17; 18:8.
Bot muor gud nyuuz de. Jeuova no figet bout di gud piipl dem iina di difrant difrant faalz rilijan dem aal uova di worl uu riili waahn fi sorv im. Rait nou im a bring dem piipl de tugeda az im tiich dem di chuut.—Riid Jan 6:5.
3. We di piipl dem we riili waahn sorv Gad fi du?
Chuu rilijan a bring piipl tugeda
Jeuova kier bout piipl uu lov di chuut an lov wa gud. So im tel dem fi kom outa faalz rilijan an no av notn muor fi du wid it. Piipl uu riili lov Gad wilin fi mek eni chienj iina dem laif fi pliiz im.—Riid Revilieshan 18:4.
Afta Jiizas ded, di gud piipl dem we did waahn sorv Gad did shuo se dem api wen dem ier di gud nyuuz fram Jiizas falara dem. Jeuova tiich dem wan nyuu wie fi liv dem laif. Da wie a laif de mek dem apiya, gi dem sopm fi liv fa, an gi dem uop fi di fyuucha. Dem set wan gud egzampl fi aal a wi tide. Wen dem ier di gud nyuuz, dem put Jeuova fos iina dem laif, an wi fi du di siem ting tu.—Riid 1 Tesaluoniyan 1:8, 9; 2:13.
Aal uu ton we fram faalz rilijan, Jeuova api fi tek dem iin az paat a im fambili. Da fambili ya mek op a aal uu worship im. Ef yu tek op Jeuova pan im aafa, yu an im a-go bi fren. Yu a-go get fi bi paat a wan lovin fambili a piipl we worship im, an yu wi get fi liv fi eva. Riid Maak 10:29, 30; 2 Korintiyan 6:17, 18.
4. A ou Gad a-go bring apinis tu di uol ort?
Di fak se Gad a-go get rid a faalz rilijan a gud nyuuz. Faalz rilijan naa go de de fi kanchuol an kanfyuuz piipl agen. Faalz rilijan naa go eva fuul op piipl agen ar kaaz dem fi fait gens dem wan aneda. Dem taim de, evribadi a-go liv az wan an sorv di onggl chuu Gad.—Riid Revilieshan 18:20, 21; 21:3, 4.
