5 Afta Jiizas si di kroud a piipl, im gu op iina di mountn an sidong; an im falara dem kom tu im. 2 An im staat fi tiich dem an se:

3 “Di piipl dem we nuo se dem niid Gad iina dem laif, a dem Gad a-go bles, kaa dem piipl de a-go get Gad govament we de a evn.

4 “Yu si di piipl dem we a baal, a dem Gad a-go bles, kaa im a-go osh dem an mek dem fiil beta.

5 “Di piipl dem we ombl demself, a dem Gad a-go bles, kaa a dem a-go kom get di ort.

6 “Yu si di piipl dem we wel waahn fi si di sitn dem we rait iina Gad yai apm, a dem piipl de Gad a-go bles, kaa Gad a-go mek shuor se dem get evriting we dem waahn.

7 “Di piipl dem we redi fi paadn ada piipl, Gad a-go bles dem, kaa im a-go paadn dem tu.

8 “Di piipl dem uufa aat kliin, Gad a-go bles dem, kaa dem a-go get fi nuo Gad.

9 “Di piipl dem we redi fi du wa dem fi du fi liv iina piis wid ada piipl, a dem Gad a-go bles, kaa Gad a-go kaal dem im pikni.

10 “Di piipl dem we a sofa kaa dem a du di sitn dem we Gad waahn dem fi du, a dem Gad a-go bles, kaa dem piipl de a-go get Gad govament we de a evn.

11 “Wen piipl shiem unu an chriit unu bad kaa unu a fala mi an tel aal kain-a lai pan unu an dem taak aal kain-a bad sitn bout unu, a unu Gad a-go bles. 12 Unu fi mek unuself api so til, kaa Gad av uol iip a nais sitn pudong fu’unu. Kaa di siem wie ou dem a chriit unu bad an a mek tingz aad fu’unu, a siem so dem yuus tu chriit di prafit dem we did de bout bifuo fu’unu taim.

13 “Unu komiin laik di saalt we de iina da worl ya, bot ef di saalt no ties laik saalt agen, yu tingk it av no yuus? Nuo sa! Di onggl ting yu kyan go du wid it a dash it outa duor an mek piipl waak op an dong pan it.

14 “Unu komiin laik lait iina dis ya worl ya we so daak. Yu kyaahn aid wan siti we de pan tap a wan il tap. 15 Wen piipl lait wan lamp, dem no put it anda wan baaskit, dem put it pan wan tiebl so das it kyan lait op di ous fi evribadi. 16 A siem wie so unu fi mek unu lait shain so dat evribadi kyan si’it. An wen dem si di gud sitn dem we unu a du, dem a-go big op unu Faada we de a evn.

17 “No tingk mi kom fi get rid a di Laa ar di sitn dem we di prafit dem did rait dong. Mi neehn kom ya fi get rid a dem, a kom mi kom ya fi mek evriting we dem se apm fi chuu. 18 Mi a tel unu ino, it wuda iiziya fi di evn an di ort gu we dan fi iivn wan leta outa wan wod gu we, ar fi iivn piis a wan a di leta dem we di Laa se wuda apm no apm fi chuu. So evriting we de iina Gad Wod a-go apm jos laik ou im se it wuda apm. 19 So ef enibadi brok non a Gad Laa dem, aal di wan dem we dem mait-a no tingk so impuotant, an tiich ada piipl fi brok it tu, dem naa go get fi bi paat a Gad govament we de iina evn. Bot enibadi we a du wa di Laa se dem fi du an a tiich ada piipl fi du wa it se, dem piipl de a-go bi paat a Gad govament we de a evn. 20 Mi a tel unu  se ef unu naa chos iina Gad muor dan di Farisii dem a an muor dan di man dem we tiich di Laa, unu naa go get fi go iina Gad govament we de iina evn.

21 “Yu did ier se dem did tel yu piipl dem we did liv bifuo fi yu taim se: ‘Yu no fi kil nobadi, an enibadi we kil nobadi, dem a-go kya dem go a kuot ous, an dem afi go ansa fi wa dem du.’ 22 Bot mi a tel yu, enibadi we aalwiez beks wid dem breda ar sista afi go ansa fi wa dem du tu. An enibadi we tel dem breda ar sista at wod, dem a-go joj dem iina di bigis kuot we de iina di konchri. An enibadi we kaal nobadi ‘oul fuul’ ar ‘oul iidiyat,’ dem a-go sentans dem fi ded.

23 “So ef yu a kya wan aafrin go a Gad ous, an yu memba se yu breda ar sista av sitn gens yu, 24 pudong yu gif infronta di alta an ton bak go mek piis wid yu breda ar yu sista, an den kom bak an gi op yu gif.

25 “Ef sumadi a kya yu go kuot ous, chrai fi saat out tingz kwik kwik wen unu a go de, kaa ef yu no du dat im mait-a kya yu infronta di joj, an den di joj mait-a sentans yu an gi yu tu di afisa fi im fling yu iina prizn. 26 An mi a tel yu se, bai di taim yu kum out de, yu a-go brok kaa yu afi go pie dem evri sent we yu av.

27 “Yu did ier se: ‘Ef yu marid yu no fi sliip wid nobadi we yu no marid tu.’ 28 Bot mi a tel yu se ef yu gwaan luk pan wan uman we yu no marid tu laik se yu waahn fi sliip wid ar, it wuda komiin laik se yu don sliip wid ar aredi iina yu main kaa a dat ya’a tingk bout. 29 So ef yu rait yai a mek yu sin, tier it out an dash it we, kaa it beta yu luuz paat a yu badi dan fi yu luuz di wol a it. 30 An ef yu rait an a mek yu sin, chap it aaf an dash it we, kaa it beta yu luuz paat a yu badi dan fi yu luuz di wol a it.

31 “An yu did ier se: ‘Ef wan man lef im waif, im fi gi ar di piepa we mek ar nuo se im no marid tu ar agen.’ 32 Bot mi a tel yu ino, wan man no fi lef im waif an gi ar di piepa we shuo se dem no marid agen anles im fain out se shi sliip wid sumadi els ar gwaan wid som ada kain-a seks sin. Kaa ef im lef ar an shi neehn du notn, it mait-a kaaz ar fi go sliip wid sumadi els an sin. An ef sumadi go marid tu ar, a sin im wudaana sin tu kaa im wudaana sliip wid wan neda man waif.

33 “An yu nuo se dem did tel unu faada faada dem se: ‘Unu no fi swier se unu a-go du sitn an den no dwi’it. So eniting we yu pramis Jeuova se yu a-go du, yu fi dwi’it.’ 34 Mi a tel unu ino: Unu no fi swier an tek no uot at aal at aal, an no swier an kaal pan evn fi mek piipl si se wa ya’a se a so it go fi chuu, kaa a de-so Gad a ruul fram; 35 an no bada swier an kaal pan di ort niida, kaa di ort a di stuul we Gad put im fut pan. An yu si Jeruusilem, no bada swier an kaal pan it niida, kaa Jeruusilem a Gad siti an a im a di king fi da siti de. 36 An no swier pan yu uona laif, kaa yu kyaahn mek wan schraan a ier pan yu ed ton blak ar wait. 37 So ef a ‘Yes’ yu a se, a yes, an ef a ‘Nuo,’ a nuo. Kaa ef yu no du wa yu se yu a-go du, den dat miin se a Sietan yu a fala.

38 “Yu did ier se: ‘Ef sumadi juk yu iina yu yai, sumadi fi juk dem bak iina fi dem yai tu. An ef sumadi lik out sumadi tiit, sumadi fi lik out bak fi dem tiit tu.’ 39 Bot mi a tel yu: Ef sumadi we wikid waahn fi fait yu, no fait dem bak. An ef sumadi baks yu pan wan said a yu fies, den ton di ada said gi dem tu. 40 An ef sumadi waahn kya yu go a kuot ous fi tek we yu shot, aal gi’im yu  jakit tu; 41 an ef di sumadi we inchaaj a yu aks yu fi go wan mail, den go tuu mail. 42 An ef sumadi aks yu fi sopm, yu fi gi dem it. An ef sumadi waahn fi baro sitn fram yu, yu no fi se yu naa len dem it.

43 “Yu did ier se som Laa tiicha did se: ‘Yu fi lov yu nieba dem an yu fi iet yu enimi dem.’ 44 Bot mi a tel yu se: Yu fi gwaan lov yu enimi dem an yu fi prie fi di wan dem we a mek tingz aad fi yu. 45 Yu si ef unu du dat, unu a shuo se unu a fala unu Faada we de iina evn, kaa im mek im son shain pan gud piipl an wikid piipl tu, an im mek di rien faal pan di piipl dem we du wa gud an di wan dem we du wa bad tu. 46 Ef yu onggl lov di wan dem we lov yu, dat a no notn, kaa aal di man dem we kalek taks b du dat tu. 47 An ef yu onggl se ‘Oudi’ tu yu fren dem, dat a no notn big, kaa di piipl dem we naa sorv Gad a du dat tu. 48 Unu fi riili lov piipl fram unu aat jos laik ou unu Faada we de iina evn lov piipl.

6 “Mek shuor se wen yu a du wa rait yu no onggl a du it jos fi piipl si wa yu a du. Ef a dat unu a du, unu naa go get no blesn fram unu Faada we de iina evn. 2 So wen yu a du sitn gud fi sumadi, yu no fi mek a bag a naiz fi mek piipl si wa yu a du, kaa a dat di ipokrit dem du wen dem de outa ruod an wen dem go wich paat dem a worship. Dem onggl a du dis kaa dem waahn piipl fi big dem op. Bot mi a tel unu ino, di onggl ting we dem a-go get a di big op we di piipl dem gi dem. 3 So wen yu a du sitn gud fi sumadi, no mek nobadi nuo wa yu a du. 4 Wen ya’a du som gud sitn an yu naa du it fi piipl si yu, a dat a-go mek yu Faada we si an nuo evriting bles yu.

5 “An wen unu a prie, no gwaan laik di ipokrit dem. Wen dem a prie dem laik fi tan op wich paat evribadi kyan si dem, laik wen dem de pan di ruod, an wen dem go wich paat dem a worship. Kaa mi a tel yu, dat a di onggl big op we dem a-go get. 6 Bot wen yu a prie, yu wan fi go iina yu ruum an lak yu duor baka yu an den prie tu yu Faada. Kaa aalduo nobadi kyaahn si’im, im kyan si evriting we yu a du, an a im a-go bles yu. 7 So yu si wen unu a prie, unu no fi se di siem ting uova an uova agen, kaa a piipl we no nuo ou fi worship Gad di rait wie du dat. Dem tingk se wen dem a prie lang an a chat an a galang, dat miin tu se Gad a ier dem. 8 So no gwaan laik dem, kaa yu Faada nuo wa yu niid aal bifuo yu aks im fi’it.

9 “Wen unu a prie, dis a ou unu fi prie:

“‘Wi Faada we de iina evn, wi prie se piipl av nof rispek fi yu niem. 10 Wi a prie fi yu govament ruul uova di ort. An wi a prie se jos laik ou wa yu waahn fi apm iina evn a apm, a siem so wi a prie se wa yu waahn fi apm pan ort apm. 11 Wi a beg yu gi wi di fuud we wi niid fi da die ya; 12 an wi a beg yu fi paadn wi wen wi du sitn rang jos laik ou wi paadn sumadi wen dem du wi sitn rang. 13 No mek notn kom iina wi wie we a-go mek wi waahn fi du notn rang. Bot no onggl dat, wi a beg yu fi protek wi fram di Devl.’

14 “So ef yu paadn sumadi wen dem du yu sitn rang, a siem so yu Faada a-go paadn yu wen yu du sitn rang tu. 15 Bot ef yu no paadn sumadi we du yu sitn rang, yu Faada naa go paadn yu wen yu du notn rang.

16 “An wen yu no iit no fuud somtaim kaa yu a worship Gad, no gu roun di plies a lang dong yu fies laik di ipokrit dem we a gwaan laik se dem a worship Gad. Dem a lang dong dem fies fi mek piipl si se dem a faas. Mi a tel unu,  dis a di onggl big op we dem a-go get. 17 Bot wen yu naa iit no fuud som a di taim kaa yu a worship Gad, wash yu fies an kuom yu ier. 18 Wen yu du dat, piipl naa go nuo se yu naa nyam notn. Da taim de onggl yu Faada we de iina evn a-go nuo wa yu a du. Den yu Faada we si evriting we yu a du a-go bles yu.

19 “No gyada op uol iip a moni an ting fi yuself pan di ort, kaa dem kyan get rosti an worm an dem ting de kyan nyam it dong, ar tiif mait-a kom tiif it. 20 Bot wa unu fi a du a wok aad fi du di sitn dem we wot nof tu Gad we de iina evn, kaa notn we de a evn kyaahn get rosti, an worm an dem ting de kyaahn du dem notn, an no tiif kyaahn tiif it. 21 Kaa eniting we wot nof tu yu, a dat yu aalwiez a-go a tingk bout.

22 “Yu yai komiin laik di lamp we a-go lait op yu badi. So ef yu yai a luk pan di rait sitn dem, di uol a yu badi a-go brait. 23 Bot ef yu naa luk pan tingz di rait wie, den it a-go komiin laik se yu de somwe we pich blak. An mi a tel yu, tingz naa go nais wid yu ef di lait we iina yu go out out!

24 “Nobadi kyaahn wok fi tuu baas man, kaa ef im lov wan a dem im a-go iet di ada wan. An ef im stik tu wan a dem, den im naa go rispek di ada man. So ef moni a di big ting iina yu laif, yu naa go kyan sorv Gad.

25 “An a das wai mi a tel unu se: Yu no fi a wori wori op yuself bout wa yu a-go nyam ar wa yu a-go jringk ar wa yu a-go wier. Yu no tingk yu laif wot muor dan di fuud we yu a nyam an yu badi wot muor dan di kluoz we yu a wier? Iihn? 26 Sidong an tek iin di bod dem, dem no plaant notn an dem no riip notn, an dem no gyada op notn niida. Bot yu Faada we de iina evn stil gi dem fuud fi nyam. Yu no tingk yu wot muor dan dem tu im? 27 A wich wan a unu kaa unu a wori an fret kyan ad wan owa tu unu laif? 28 An wa mek unu a wori bout we unu a-go get kluoz fi wier? Luk pan di wail flowaz dem we de bout di plies; dem naa wok aad an dem naa mek no kluoz. 29 Mi a tel yu, nat iivn King Salaman we did rich bad did jres op an luk nais laik wan a dem flowaz ya. 30 Dis a ou Gad mek dem flowaz ya priti aalduo dem mait-a dis gruo fi wan die an den jrai op di neks die an piipl tek dem an bon dem op. A siem so im a-go du nof muor sitn fi unu aalduo unu nat iivn a chos iina im so moch. 31 So no wori an se tu unuself se, ‘A wa wi a-go nyam?’ ar, ‘A wa wi a-go jringk?’ ar, ‘A wa wi a-go wier?’ 32 Kaa a piipl we no nuo Gad wori an fret bout dem sitn ya, kaa unu Faada we de op iina evn don nuo se unu niid dem sitn ya aredi.

33 “Mek Gad govament an di ting dem we im tel yu fi du bi di big ting iina yu laif an Gad a-go gi yu evriting we yu niid fi liv. 34 So no wori an fret bout wa a-go apm tumaro kaa yu av inof chobl a diil wid tide. An tumaro a-go av fi’it uona prablem dem.

7 “Tap chat bad bout piipl an joj dem, laik se Gad kyaahn go paadn dem, so das di siem ting no apm tu yu tu. 2 Siem wie laik ou yu chriit ada piipl an joj dem, a di siem wie Gad a-go chriit yu. 3 Wa mek yu a luk pan di likl piis a saados we iina yu breda ar sista yai an naa si di big piis a tik we iina fi yu yai? 4 Bot luk pan yu tu, a tel yu breda ar sista se, ‘Mek mi tek di likl piis a saados outa fi yu yai,’ wen yu av wan big oul piis a tik iina fi yu yai? 5 Unu oul ipokrit! Di fos ting unu fi du a tek out di big oul tik outa fu’unu yai, an den unu kyan go si gud fi tek out di likl piis a saados outa unu breda ar sista yai.

6 “No gi Gad sitn dem tu di daag dem an no fling di sitn dem we wot nof tu yu gi di pig dem. Kaaz dem a-go tep tep  op pan dem, an wen dem don dem a-go ton pan yu tu an bait bait yu op.

7 “No tap aks Gad fi di sitn dem we yu niid, an im a-go gi yu dem. No tap luk tu im fi im elp yu, an yu a-go si se im a-go elp yu. An no tap nak an aks im fi mek yu kom iin, an im a-go uopm op di duor fi yu. 8 Ye man mi a tel unu, evribadi we aks fi sitn a-go get wa dem aks fa; an evribadi we luk tu im fi im elp dem, im a-go elp dem tu, an evribadi we no tap nak pan di duor a-go get fi go iin. 9 A wich wan a unu, ef unu pikni aks unu fi piis a bred, unu a-go gi’im wan stuon? 10 Ar ef im aks yu fi wan fish, unu a-go gi’im wan siniek? 11 Unu nuo ou fi gi unu pikni som nais prezent iivn duo unu a du nof bad sitn, no chuu? So unu kyan nuo fi shuor se ef unu aks unu Faada we op iina evn fi notn, im a-go gi unu som nais sitn!

12 “Yu fi aalwiez chriit piipl di wie ou yu waahn dem fi chriit yu. A dis di prafit dem an di Laa did a se.

13 “Go chuu di likl giet, kaa yu si di ruod an di giet we kyari piipl go ded, dem big an braad, an a wol iip a piipl a go chuu da giet de. 14 Bot yu si di giet we piipl go chuu an di ruod we piipl de pan we a-go mek dem kyan liv fi eva, dem likl an naro an a onggl likl bit a piipl fain da ruod de.

15 “Luk out fi di faalz prafit dem we gwaan laik se dem a shiip we naa go du notn fi ort yu, bot dem komiin laik som wikid wail animal we onggl waahn fi ort yu. 16 Yu naa go eva si griep a gruo pan makabush, an yu naa go eva si wan swiit fruut a gruo pan di wiid dem. Jos laik ou yu kyan nuo wan chrii bies pan di fruut we de pan it, a siem so yu kyan nuo uu sumadi riili bi bies pan di sitn dem we dem a du. 17 So unu si wa mi a se, wi onggl kyan get fruut we gud fram wan gud chrii. Bot ef di chrii no gud di fruut we kom aafa it naa go gud niida; a onggl fruut we no gud a-go kom fram it. 18 Yu naa go get wan fruut we no gud fram wan chrii we gud, an yu naa go get wan fruut we gud fram wan chrii we no gud, no chuu? 19 Wen piipl naa get no fruut we gud fram wan chrii, dem chap it dong an bon it op. 20 Mi a tel unu, a siem so unu a-go nuo di faalz prafit dem bies pan di sitn dem we dem a du.

21 “A no evribadi we a kaal mi ‘Laad, Laad,’ a-go get fi bi paat a Gad govament we de a evn. A onggl di wan dem we du wa mi Faada waahn dem fi du a-go get fi bi paat a da govament de. 22 Di die a-go kom wen wol iip a piipl a-go kom an se, ‘Laad, Laad, yu no memba ou wi did a tel nof piipl bout yu, an ou wi did yuuz yu niem fi ron out di diiman dem outa piipl, an ou wi did yuuz yu powa fi wok nof mirikl? Yu no memba?’ 23 Bot mi a-go tel dem se: ‘Unu oul wikid piipl, mi no nuo unu! Unu gwe fram mi!’

24 “So mi a tel unu se enibadi we lisn tu wa mi a se an du wa mi a se komiin laik wan man we nuo wa im a du, we mek op im ous pan wan big oul rakstuon. 25 So wen di rien staat fi faal aad, an di briiz staat fi bluo aad pan di ous, notn neehn apm tu it kaaz im did mek it op pan wan big oul rakstuon. 26 Bot ef sumadi ier wa mi a se, an dem no du wa mi a se, den im komiin laik di man we no nuo wa im a du an mek op im ous pan di san. 27 Bot yu si da wan ya, wen di rien staat fi faal aad an di plies flod out an di briiz bluo pan di ous, di ous dis bluo dong an mash op.”

28 Wen Jiizas don taak tu dem, dem mout jrap a grong, kaaz dem neehn nou se im kuda tiich so gud, 29 kaaz Jiizas did a tiich dem laik se a Gad gi’im di powa fi tiich dem, im neehn a tiich dem laik ou di Laa tiicha dem wuda dwi’it.