Wa mek wi so api wen wi de a wi kanvenshan dem? Jos laik di kanvenshan dem we di Izrelait dem yuus tu kip, a siem so wi kanvenshan dem gi wi a chaans fi worship Jeuova wid uol iip a wi breda an sista dem. Wi api fi aal a di sitn dem we wi get fi elp wi fi lorn muo bout Jeuova so dat wi kyan stie kluos tu im. An wi lov di nais taim dem we wi spen wid wi fren dem an wi fambili. Kaa wi tangk Jeuova so moch fi aal a dis, wi mek shuor se wi no mis non a di kanvenshan die dem.

Wen wi get di chaans fi miit wid wi breda an sista dem, wi no fi jos tingk bout wa wi kyan get outa it, bot wi fi luk fi si ou wi kyan shuo lov tu ada piipl. (Gya 6:10; Iib 10:24, 25) Wen wi uol di duor so dat wan breda ar wan sista kyan go chuu, an wi no siev muo siit dan wa wi niid, wi shuo se wi a luk out fi ada piipl. (Fil 2:3, 4) Wen wi go a wi kanvenshan dem, wi kyan fain nyuu fren. Bifuo di pruogram staat an afta it don an iina wi lonch taim, wi kyan go miit som piipl we wi neehn nuo bifuo. (2Kor 6:13) Di fren dem we wi mek dem taim de wi kyan av dem fi laif! Bot muo dan eniting els, wen ada piipl si umoch wi lov wi wan aneda, dem mait-a kom sorv Jeuova wid wi tu.​—Jan 13:35.

WACH DI VIDIYO “LOV NEVA EVA TAP”! DI KANVENSHAN DEM WID PIIPL FRAM AAL UOVA DI WORL, AN DEN ANSA DEM KWESTIYAN YA:

• Ou dem did shuo se dem lov di breda an sista dem we did go a di 2019 kanvenshan dem fram aal uova di worl?

• Wa mek di lov an tugedanis we yu si mongks Jeuova piipl a sitn we yu no si iina di worl?

• Wa a som a di ting dem we di breda dem we de pan di Govanin Badi tel wi bout ou Kristiyan supuos tu shuo lov?

• Ou lov did elp wi breda an sista dem iina Germany an South Korea fi kom tugeda az wan?

• Wa wi fi mek op wi main fi du?