Di worl we wi liv iina mek wa gud luk laik it bad an wa bad luk laik it gud. (Isa 5:20) Sad fi se, som piipl du tingz we Jeuova iet. Laik man du tingz we dem no fi du wid ada man, an uman du tingz we dem no fi du wid ada uman. Di pikni dem we dem go a skuul wid ar ada piipl mait-a chrai fi get wi nais pikni dem fi du wa dem a du. Ou yu kyan elp yu pikni dem fi mek shuor dem go chuu dem tes ya aarait an eni ada tes we dem afi go chuu?

Tel yu pikni dem bout wa dem niid fi nuo bout wa Jeuova waahn dem fi du. (Le 18:3) Likl bai likl, tel dem bout wa di Baibl se bout seks. Tel dem tingz bies pan dem iej. (De 6:7) Aks yuself dem kwestiyan ya: ‘Mi tel mi pikni dem bout wa a di rait an rang wie fi ada piipl toch dem, bout ou fi no wier kluoz we shuo op dem badi ar we tuu tait, an dat ada piipl no fi waahn si dem wen dem a du sortn tingz? Mi pikni dem wuda nuo wa fi du ef sumadi chrai fi shuo dem sitn wid piipl we aaf-niekid ar niekid, ar piipl a sliip wid dem wan aneda ar ef sumadi aks dem fi du sitn we Jeuova se rang?’ Ef dem nuo wa fi du bifuo it apm, it wi elp dem so dat bad tingz no apm tu dem. (Pr 27:12; Ec 7:12) Wen yu tiich yu pikni dem dem sitn ya, yu shuo se yu lov di preshos gif dem we Jeuova gi yu.​—Ps 127:3.

WACH DI VIDIYO MEK YU FAMBILI CHRANG​—PROTEK YU PIKNI DEM FRAM “IIVL TINGZ” AN DEN ANSA DEM KWESTIYAN YA:

• Wa mek som mada an faada mait-a fried fi taak tu dem pikni dem bout seks?

• Wa mek di mada an faada dem fi tiich dem pikni “fi liv di wie ou di Laad waahn dem fi liv”?​—Ifii 6:4

• Wa a som a di sitn dem we Jeuova aaganaizieshan gi di mada an faada dem so dat dem kyan tiich dem pikni dem bout seks?​—w19.05-E 12, di baks

• Wa mek yu fi taak tu yu pikni dem afn bifuo sitn bad apm?