Wa mek yu fi redi? It no tek notn fi eni wan a wi get sik an afi go a aspital. So a nou a di taim fi wi du aal we wi kyan du fi mek shuor se wi redi fi sitn laka dat. Wen wi du dat, wi shuo se laif wot nof tu wi laik ou it wot nof tu Jeuova, an wi shuo se wi rispek we im se bout blod.​—Aks 15:28, 29.

Wa yu kyan du fi mek shuor se yu redi?

• Mek shuor se yu tek di taim fi prie an riid op wa de pan di “durable power of attorney” (DPA) kyaad bifuo yu rait it op. a Di breda an sista dem we baptaiz kyan get wan a di DPA kyaad dem fram di breda we inchaaj a di buk an pamplet dem. An dem kyan get wan Identity Card (ic) fi dem pikni fram im tu

• Ef yu pregnant, yu kyan aks wan a di elda dem fi wan a di sitn dem we niem Information for Expectant Mothers (S-401). It wi elp yu fi mek op yu main fi du di rait ting ef yu get sik bifuo yu av biebi ar wen yu a av biebi

• Bifuo yu go du wan aparieshan we dem mait-a waahn fi yuuz blod, ar yu afi go stie iina di aspital, mek di elda dem nuo. An mek di piipl dem we wok a di aspital nuo se yu wuda waahn wan a di elda dem fi kom vizit yu

Ou di elda dem kyan elp yu? Di elda dem kyan elp yu fi rait op yu DPA kyaad. Bot dem naa go tel yu wa fi du ef yu sik, an dem naa go tel yu wa dem wuda du ef dem sik niida. (Ruo 14:12; Gya 6:5) Wen yu tel di elda dem iina yu kanggrigieshan se yu a-go du wan aparieshan an dem kuda waahn fi yuuz blod, dem wi kaal di breda dem we de pan di “Hospital Liaison Committee” (HLC) fi elp yu.

Ou di breda dem pan di HLC kyan elp yu? Di breda dem we de pan di HLC get chrienin fi elp di dakta dem an dem piipl de andastan wa mek Jeuova Witnis no tek blod. Dem wi taak tu di dakta dem an mek dem nuo ou dem kyan du di aparieshan dem widout blod. An dem kyan elp yu fi fain wan dakta we wi du di aparieshan widout blod.

WACH DI VIDIYO WA KYAN ELP YU FI MEK OP YU MAIN BOUT BLOD WEN YU SIK?, AN DEN ANSA DA KWESTIYAN YA:

• Wa yu lorn fram di vidiyo we kyan elp yu ef yu sik an afi go a dakta kwik fi go du wan aparieshan we dem kuda waahn fi yuuz blod?

  Rait yu ansa