Orikien an dem ting de a apm muor an muor iina fi wi taim ya nou. Wen sitn laka dat gwaan, tingz afi set op iina di prapa wie so dat wi kyan elp out wi breda an sista dem. An a das wai di Govanin Badi set op wan Dizaasta Riliif Dipaatment iina evri wan a di branch afis dem.

Wen di breda dem we wok iina da dipaatment de ier se wan orikien ar sitn laka dat gwaan, dem no ich, dem fain out fram di elda dem we liv iina da ieriya de wa kain-a elp di breda an sista dem a-go niid. Ef di wok fi elp out di breda an sista dem biga dan wa di breda an sista dem we liv iina di ieriya kyan manij, di branch afis wi sen som breda we nuo wa dem a du fi tek di liid an elp out wid di wok. Dem mait-a aks som breda an sista fi kom elp out, ar dem mait aks dem fi gi sortn an sortn tingz we di breda an sista dem niid. An somtaim dem wi bai di tingz dem we di breda an sista dem niid iina di konchri we dem liv an gi it tu dem.

Wen di breda an sista dem no tek it op pan demself fi go elp out, an dem fala wa di breda dem we a tek di liid se, tingz wok out beta. Da wie de wi naa go av no kanfyuuzhan, wi naa go wies moni an dem ting de, an di wok naa go dobl op.

Di breda dem we di branch afis put fi saat out tingz, wi nuo umoch moni an umoch piipl dem niid fi elp out wid di wok. Plos, dem wi nuo uu fi taak tu iina di ieriya we kyan elp fi mek di wok muuv faasa. So du, wi a beg unu, no tek it op pan unuself fi kalek no moni ar kalek no tingz sen go gi di breda an sista dem. An du, no tek it op pan unuself fi go a wan neda ieriya go elp out ef di breda dem neehn aks yu fi du dat.

Kaaz wi lov wi breda an sista dem, wen wan orikien ar sitn laka dat gwaan wi wel waahn fi elp out. (Iib 13:16) So wa wi kyan du fi elp? Di bes ting wi kyan du a prie fi wi breda an sista dem we a go chuu dem sitn de an di wan dem we a elp dem out. Wan neda ting wi kyan du a gi moni tu di worl waid wok. Di branch afis dem wok wid di Govanin Badi fi nuo ou fi yuuz di moni iina di bes wie fi elp di breda dem. Ef wi waahn fi go elp out wen sitn laik dis apm wi kyan sain op di Local Design/​Construction Volunteer Application (DC-50).

WACH DI VIDIYO SOM TORBL FLOD WE GWAAN A BRAZIL, AN DEN ANSA DA KWESTIYAN YA:

Wa yu laik bout ou di Jeuova Witnis dem did elp out afta di torbl flod we gwaan a Brazil iina 2020?