A wich rekaadn wi a taak bout? Dis a di rekaadn we di breda dem du fi di New World Translation Baibl. Dem a chrai fi mek piipl kyan get dis iina nof a di langwij dem. Wan nais ting bout dem rekaadn ya, a dat dem yuuz difrant difrant piipl a taak fi di difrant sumadi dem iina di Baibl. Di wie ou dem riid di wod dem, yu kyan riili get ou di piipl dem did a fiil an dem elp wi fi get we di Baibl riili a se.

Wen dem lisn tu di Baibl rekaadn dem, a ou it a elp som a wi breda an sista dem? Nof a di piipl dem uu lisn tu di Baibl rekaadn dem aafn, se dem lov ou it mek di Baibl nais fi dem. Wen dem ier di difrant difrant sumadi dem a riid fi di difrant difrant piipl dem iina di Baibl, it komiin laik dem kyan si wa a gwaan an it elp dem fi get wa it a se beta. (Pr 4:5) An nof a dem se dem fain se wen dem lisn di Baibl rekaadn dem, it elp fi gi dem piis iina dem aat an main wen dem a fret an wori wori op demself.​—Ps 94:19.

Wen wi ier sumadi a riid Gad Wod, it kyan du wol iip fi wi. (2Ch 34:19-21) Ef yu kyan get di wol a di Baibl rekaadn dem ar miebi som a dem iina wan langwij we yu andastan, chrai an lisn dem wen yu a du tingz we jraa yu kluosa tu Jeuova.

WACH DI VIDIYO WAN PAAT FRAM DI VIDIYO WE NIEM, OU DEM MEK DI BAIBL REKAADN DEM, AN DEN ANSA DA KWESTIYAN YA:

Wa yu laik bout ou dem mek di Baibl rekaadn dem?