Jeuova suun get fed op a da worl ya. Non a di faalz rilijan dem naa go de ya agen kaa dem a-go get mash dong, an som konchri a-go jain op tugeda fi fait gens Gad piipl. Iina Aamagedan Jeuova a-go kil aaf aal a di wikid piipl dem. Di piipl dem we a worship Gad iina di rait an prapa wie kyaahn wiet fi dem sitn ya apm.

Bot wi no nuo evriting we a-go apm wen di torbl torbl sofarieshan a gwaan. Laik wi no nuo wen it a-go staat, an wi no nuo wa riizn di govament dem a-go gi wen dem ton gens di rilijan dem. An wi no nuo ou lang di konchri dem a-go de fait gens Gad piipl fa, an wi no nuo ou dem a-go dwi’it. Plos, wi no nuo wa Jeuova a-go yuuz fi don di wikid piipl dem a Aamagedan.

Bot, wi nuo se wi na’afi fried fi wa a-go kom iina di fyuucha kaa di Baibl mek wi nuo wa wi niid fi nuo so wi kyan briev an wi na’afi wori wori op wiself. Laik wi nuo se wi a liv “iina di laas die dem.” (2Ti 3:1) An wi nuo se Jeuova a-go “kot dong” di taim we di konchri dem a-go yuuz fi don di rilijan dem, so dat dem no don fi im aaganaizieshan tu. (Mt 24:22) Wi nuo fi shuor se Jeuova a-go siev im piipl dem. (2Pii 2:9) An wi nuo se di sumadi we Jeuova pik fi kil aaf di wikid piipl dem, im aalwiez du wa rait an im powaful, so im a-go elp di big kroud a piipl fi go chuu Aamagedan.​—Re 19:11, 15, 16.

Di tingz dem we a-go apm iina di fyuucha a-go mek piipl “kech dem fried an kin uova.” Bot wen wi riid wi Baibl an tek di taim fi tingk bout ou Jeuova siev im piipl dem bak iina di diez an wa im tel wi se a-go apm iina di fyuucha, dat kyan mek wi ‘tan op chriet an uol op wi ed’ kaa wi nuo fi shuor se di taim fi im siev wi suun kom.​—Lu 21:26, 28.