PIIPL

Dis a wa di Baibl se: Gad “neehn mek di ort fi notn, bot im mek it fi piipl liv pan it.”​—AIZAIYA 45:18.

DI ORT

Dis a wa di Baibl se: “Wan set a piipl baan an ded aaf, an wan neda set a-go baan an ded aaf tu, bot yu si di ort, it a-go de ya fi eva.”​—IIKLIIZIYASTIIZ 1:4.

WA DIS RIILI A SE: Di Baibl mek wi nuo se di ort naa go mash op, an piipl a-go de pan it fi eva. So wen it se di worl a-go don, wa dat riili miin?

TINGK BOUT DIS: Di Baibl mek wi nuo se di taim wen da worl ya a-go don, komiin laik wa did gwaan wen di worl did a-go don iina di taim wen Nowa did de pan di ort. Iina dem taim de ‘di ort did ful op a bier vailens.’ (Jenisiz 6:13) Bot Nowa did a du wa rait. So Gad siev Nowa an im fambili, bot im yuuz wan flod fi get rid a aal a di wikid piipl dem. Iina Sekan Piita 3:6, di Baibl taak bout wa did apm dem taim de. It se: ‘Waata did flod out an mash op di worl we did de bout wan taim.’ A so kom da worl de did don. Bot a neehn di ort mash op. A di wikid piipl dem Gad did get rid a. So wen di Baibl se di worl a-go don, it naa tel wi se di ort a-go mash op. Wa it riili a se, a dat Gad a-go get rid a aal a di wikid piipl dem an aal a di wikid sitn dem we a gwaan pan di ort.

AAL A WI PRABLEM DEM AN DI WIKIDNIS WE A GWAAN

Dis a wa di Baibl se: “Likl fram dis, no muo wikid piipl naa go de bout agen; dem naa go de wich paat dem yuus tu de, an yu naa go si no sain a dem agen. Bot di wan dem we ombl demself, yu si di ort, a dem piipl de a-go kom get it. An dem a-go api so til, kaa piis a-go de evriwe.”​—SAAM 37:10, 11.

WA DIS RIILI A SE: Di Flod we did gwaan iina Nowa taim neva get rid a wikidnis fi eva. Afta di Flod, piipl did staat du bak wikid tingz pan di ort, an dat mek laif aad fi ada piipl. Bot suun suun, Gad a-go get rid a aal a di wikidnis we a gwaan pan di ort. Dem taim de, it gweehn bi jos laik wa di sumadi we rait da Saam ya se: “No muo wikid piipl naa go de bout agen.” An yu nuo wa Gad a-go yuuz fi du dis? Im a-go yuuz fi im Kindom, we a fi im govament. Da govament de ruul fram evn, an it a-go ruul uova di piipl dem we du wa Gad se.

TINGK BOUT DIS: Yu tingk di piipl dem we a ruul da ort ya nou a-go waahn fi du wa Gad se dem fi du? Di Baibl tel wi se dem naa go waahn du dat at aal. It shuo wi se dem a-go fu-fuul an chrai fi fait gens Gad Kindom. (Saam 2:2) Bot Gad Kindom a-go don aal a di govament dem we a ruul. Daniyel 2:44 tel wi se a “it wan gweehn ruul fi eva.” Bot wa mek Gad afi get rid a aal a dem govament ya?

Dis a wa di Baibl se: “It no op tu man fi iivn disaid fi imself ou im fi waak.”​—JERIMAIYA 10:23.

WA DIS RIILI A SE: Gad neehn mek man fi ruul demself. Di wie ou dem ruul shuo se dem no nuo ou fi ruul uova piipl gud, an dem kyaahn get rid a di prablem dem we piipl av.

TINGK BOUT DIS: Azkaadn tu Britannica Academic, “Di govament dem we a ruul no nuo ou fi diil wid di big big prablem dem we iina di worl, laik waar, kraim an vailens, di fak se piipl puor bad, piipl a ded fi onggri, siknis de aal bout, an orikien an dem ting de a mash op di plies.” An dem se: “Som piipl . . . biliiv se di onggl wie dem prablem ya kyan fiks a ef a wan govament a ruul di worl.” Bot iivn ef aal a di govament dem we iina di worl wok tugeda, dem stil kyaahn get rid a aal a dem prablem de, kaa dem no porfek an dem neehn mek fi du dat. A Gad Kindom a di onggl govament we a-go get rid a aal a di prablem dem iina di worl.

So wen wi ier se di worl a-go don, di Baibl riili miin se di wikid sitn dem we iina di worl a-go don wan die. Bot di piipl dem we a du wa Gad se rait no afi fried a dis. Insted-a dat, dem fi glad kaaz dem nuo se Gad a-go get rid a da wikid worl ya, an im a-go gi dem wan nyuu worl, an dat a sitn fi luk faawod tu!

So a wen aal a dis a-go gwaan? Di neks paat a-go mek yu nuo wa di Baibl se.